მალე სვანეთს განვითარების გენერალური გეგმა ექნება, რომელიც თითქმის ყველა სოფელს მოიცავს, სადაც ტურისტებისთვის მიზიდულობის ცენტრები იფუნქციონირებს. მესტიის მერმა კაპიტონ ჟორჟოლიანმა „ლაივპრესს“ განუცხადა, რომ გენგეგმა, რომელზეც ეკონომიკის სამინისტროს დაკვეთით კერძო კომპანია მუშაობს, მაისის ბოლოსთვის იქნება მზად, შემდეგ კი თანხების მოძიებაზე იფიქრებენ.

„ეს არის თითქმის ყველა სოფელში ერთმანეთთან დამაკავშირებელი ტურისტული მარშრუტები და ტურისტული მიზიდულობის ცენტრების მოწყობა. ჩვენ 160 სოფელი გვაქვს სვანეთში. ამათი დაცვა, ყველა როგორ მოექცეს ამ ტურისტულ მარშრუტში, იქნება მთავარი. როგორც ზემო სვანეთს, ისე ქვემოს უზარმაზარი პოტენციალი აქვს. შეიძლება სწორად დაგეგმვის პირობებში ათვისება მოხდეს. შარშან მარტო ტურიზმის დეპარტამენტის მეშვეობით გაიკვალა ახალი მარშრუტი ჭუბერიდან მესტიამდე და რუქებიც არსებობს. თუ მანამდე ორი-სამი კაცი დადიოდა, ახლა 200-მა გაიარა. ეს ნიშნავს მომავალ წელს 2 ათას კაცს“, - გვითხრა კაპიტონ ჟორჟოლიანმა.

მერის თქმით, საოჯახო სასტუმროების რაოდენობა გაზრდილია და თუ ადრე 120 ფუნქციონირებდა, დღეს 200-მდეა. მომზადდება საინფორმაციო ბუკლეტები, სადაც მათზე მონაცემები განთავსდება სოფლების მიხედვით. დაიტანენ ცნობებს ოჯახის, ოთახის რაოდენობის შესახებ, რაც ტურისტებისთვის გადაადგილებას კიდევ უფრო გააამარტივებს.

მესტიის მერი ამბობს, რომ ტურისტული მარშრუტების მოწყობაში მათთან ერთად ჩართულია ტურიზმის განვითარების დეპარტამენტიც. უშგულისკენ მიმავალი გზების გამართვაზე ინფრასტრუქტურის სამინისტრო მუშაობს. დაგეგმილია ახალი გვირაბის მშენებლობაც, რომელიც ზემო და ქვემო სვანეთს ერთმანეთთან დააკავშირებს, რაც კაპიტონ ჟორჟოლიანის განმარტებით, უფრო გაუიოლებს ტურისტს სვანეთში შემოსვლას.

სამეგრელო-ზემო სვანეთის გუბერნატორმა ლევან შონიამ მუნიციპალიტეტების მერებს ახალი ტურისტული მარშრუტების შემუშავება და არსებულის გამრავალფეროვნება დაავალა.