ზუგდიდის სასამართლოში დაიხურა ჩხოროწყუს მუნიციპალიტეტში არასრულწლოვანთან გარყვნილ ქმედებაში ბრალდებულის, ქალთა საფეხბურთო გუნდის 65 წლის მწვრთნელის სასამართლო პროცესი. აღნიშნული გადაწყვეტილება მოსამართლე შოთა ბიჭიამ რამდენიმე წუთის წინ მიიღო. მოცემული შუამდგომლობით სასამართლოს პროკურომა მაია ჯაბუამ მიმართა. მისი განმარტებით, იმის გამო, რომ დაზარალებული არასრულწლოვანია და საუბარია სქესობრივი ხასიათის დანაშაულზე, სხდომა უნდა დაიხუროს. შესაბამისი სურვილი გამოთქვა ბრალდებულმაც, რაც შოთა ბიჭიამ დააკმაყოფილა.

მოსამართლის თქმით, საუბარია არასრულწლოვანზე, შესაბამისად უფრო მნიშვნელოვანია მისი ინტერესების დაცვა, მეტად ვიდრე საზოგადობრივი ინტერესი.

ბრალდებულმა ადვოკატზე უარი თქვა და განაცხადა, რომ საკუთარ თავს თავად დაიცავს. მისი თქმით, დამნაშავე არ არის წარდგენილ ბრალდებაში, თუმცა შსს-ს მიერ გავრცელებულ განცხადებაში აღნიშნულია, რომ დაკავებული აღიარებს ჩადენილს.

„ეს ყველაფერი მოგონილია. მე ვარ ასაკში, გულით ავადმყოფი კაცი და ვამბობ - ასეთი რამე არ ყოფილა", - თქვა მან.

დღევანდელი პროცესი დაგვიანებით დაიწყო. შოთა ბიჭიას თქმით, მიზეზი ბრალდებულის ჯანმრთელობის მდგომარეობის გაუარესება და შემოსული რამდენიმე შუამდგომლობის განხილვა იყო.

მოცემულ საქმესთან დაკავშირებით დღეს განცხადება გაავრცელა საქართველოს მთავარმა პროკურატურამ. მასში აღნიშნულია, რომ დაკავებულს ბრალი წარედგინა სისხლის სამართლის კოდექსის 141-ე მუხლის პირველი ნაწილით, და რომ გამოძიებით დადგინდა - 2018 წლის 23 მარტს, ფეხბურთელთა გუნდის მწვრთნელმა არასრულწლოვან მოსწავლე გოგონასთან გარყვნილი ქმედება ჩაიდინა.

უფრო ადრე ინფორმაცია შსს-მაც გაავრცელა. სამართალდამცველებმა ბრალდებული 2018 წლის 31 მარტს სენაკში დააკავეს. დანაშაული 5-დან 7 წლამდე თავისუფლების აღკვეთას ითვალისწინებს.