ჩხოროწყუს მუნიციპალიტეტში არასრულწლოვანთან გარყვნილ ქმედებაში ბრალდებულს, ქალთა საფეხბურთო გუნდის 65 წლის მწვრთნელს აღმკვეთ ღონისძიებად პატიმრობა შეეფარდა. ეს გადაწყვეტილება მოსამართლე შოთა ბიჭიამ რამდენიმე წუთის წინ მიიღო. სხდომა დახურული იყო, თუმცა მისი დასრულების შემდეგ კომენტარი ჟურნალისტებთან პროკურორმა მაია ჯაბუამ გააკეთა. მისი თქმით, სასამართლომ ბრალდების მხარის შუამდგომლობა სრულად გაითვალისწინა. სხვა დეტალებზე პროკურორს არ უსაუბრია.

სანამ სხდომა დაიხურებოდა ჟურნალისტებს შესაძლებლობა ჰქონდათ მოესმინათ ბრალდებულის პოზიცია, რომელმაც სასამართლოს განუცხადა, რომ ის უდანაშაულოა. თუმცა, შინაგან საქმეთა სამინიტროს მიერ გავრცელებულ განცხადებაში აღნიშნულია, რომ ის აღიარებს ჩადენილს.

სხდომის დახურვის შუამდგომლობით მოსამართლეს ბრალდების მხარემ მიმართა. პროკურორის განმარტებით, იმის გამო, რომ დაზარალებული არასრულწლოვანია და საუბარია სქესობრივი ხასიათის დანაშაულზე, სხდომა უნდა დაიხუროს. შესაბამისი სურვილი გამოთქვა ბრალდებულმაც, რაც შოთა ბიჭიამ დააკმაყოფილა.

ბრალდებულმა ადვოკატზე უარი თქვა და განაცხადა, რომ საკუთარ თავს თავად დაიცავს.

მოცემულ საქმესთან დაკავშირებით დღეს განცხადება გაავრცელა საქართველოს მთავარმა პროკურატურამ. მასში აღნიშნულია, რომ დაკავებულს ბრალი წარედგინა სისხლის სამართლის კოდექსის 141-ე მუხლის პირველი ნაწილით, და რომ გამოძიებით დადგინდა - 2018 წლის 23 მარტს, ფეხბურთელთა გუნდის მწვრთნელმა არასრულწლოვან მოსწავლე გოგონასთან გარყვნილი ქმედება ჩაიდინა.

უფრო ადრე ინფორმაცია შსს-მაც გაავრცელა. სამართალდამცველებმა ბრალდებული 2018 წლის 31 მარტს სენაკში დააკავეს. დანაშაული 5-დან 7 წლამდე თავისუფლების აღკვეთას ითვალისწინებს.