აუტისტური სპექტრის აშლილობის მქონე შვილების მშობლები ხშირად არიდებენ ბავშვებს საზოგადოებას, მალავენ, რადგან ცნობადობა ჯერ კიდევ არ აქვთ ამაღლებული. ჩვენ აქ ვართ იმისთვის, რომ საზოგადოების არ შერცხვეთ და მიიღონ საკუთარი შვილები ისეთები, როგორებიც არიან. აუტიზმი არ არის დაავადება, აუტიზმი არის მდგომარეობა, რომელიც მუდმივია, მაგრამ ეს არ არის მდგომარეობა, რომლის დაძლევაც არ შეიძლება, - ეს გზავნილი აუტისტური სპექტრის აშლილობის მქონე შვილების მშობლებს დღეს ირმა ნოდიამ გაუგზავნა.

ის ასოციაცია „გზამკვლევს“ ხელმძღვანელობს, რომლის ბაზაზეც ზუგდიდის აუტიზმის ცენტრი ფუნქციონირებს. მას თავადაც აუტისტური სპექტრის აშლილობის მქონე შვილი ჰყავს და საკუთარი გამოცდილება სხვა მშობლებთან ერთად დღეს საზოგადოებას ზუგდიდის ბიბლიოთეკის დარბაზში გამართულ შეხვედრაზე გაუზიარა.

პრობლემა, რომელიც მშობლებმა დაასახელეს, როგორც ყველაზე მწვავე, არის ამ საკითხზე მშობლების და საზოგადოების არაინფორმირებულობა. საუბარი შეეხო მუნიციპალიტეტის იმ პროგრამებს, რომელსაც აუტისტური სპექტრის აშლილობის მქონე ბავშვებისთვის მერია ახორციელებს. სოციალური და ჯანდაცვის სამსახურის უფროსის ნინო სხულუხიას განცხადებით, 351 ათასი ლარია წელს გამოყოფილი აუტისტური სპექტრის აშლილობის მქონე ბავშვების პროგრამებისთვის, რაც გაზრდილი ოდენობაა წინა წლებთან შედარებით. ნინო სხულუხიას თქმით, მწირი ბიუჯეტის ფონზე ეს მაქსიმუმია, რაც წელს შეიძლებოდა გამოეყოთ.

ზუგდიდის მაჟორიტარი დეპუტატის მერაბ ქვარაიას განცხადებით, სწორედ ასეთი შეხვედრებითა და საუბრებით შეიძლება, დაიძლიოს ის მთავარი - არაინფორმირებულობის პრობლემა.

შეხვედრა მაჟორიტარი დეპუტატის ბიუროს და „გზამკვლევის“ ინიციატივით ჩატარდა. შეხვედრაზე ასიციაცია „ათინათმა“ წარმოადგინა ვიდეომასალა სადაც აუტისტური სპექტრის აშლილობის მქონე ბავშვების მშობლები საზოგადოებას საკუთარ გამოცდილებას და რჩევებს უზიარებდნენ.