„სვანეთის ახალგაზრდული მოძრაობა“, რომელიც ჰესების მშენებლობის საწინააღმდეგოდ გამართული აქციების აქტიური მონაწილე იყო, შს სამინისტროში გამართულ შეხვედრასთან დაკავშირებით განცხადებას ავრცელებს. მოძრაობის თქმით, მათი ძალისხმევით დაიდო მნიშვნელოვანი შედეგი, რაც არ იყო მარტივი. კერძოდ, მთავრობამ კანონპროექტში შეიტანა ცვლილება, რაც გულისხმობს ჰიდროელექტროსადგურების მშენებლობისას ადგილობრივ მოსახლეობასთან მჭიდრო კომუნიკაციას.

"მოგეხსენებათ, რომ მიუხედავად ხალხის დაგვიანებული რეაქციისა, მიმდინარეობდა აქტიური საპროტესტო აქციები. მიზანდასახულობა ამ აქციებისა იყო მიგვეღწია მესტია-ჭალა ჰესის მშენებლობის შეჩერებისთვის, ან შეგვეჩერებინა და კალაპოტში მოგვექცია ის ხელაღებულად დაგეგმილი 54 ჰესის მშენებლობა. „სვანეთის ახალგაზრდული მოძრაობის“ ძალისხმევით, რაც არ იყო ადვილი, დაიდო მნიშვნელოვანი შედეგი.

პირველი: არსებული ვითარების გათვალისწინებით, მთავრობამ კანონპროექტში შეიტანა ცვლილება, რაც გულისხმობს, რომ არცერთი პროექტი და ჰიდროელექტროსადგური მთავრობასა და ადგილობრივ მოსახლეობას შორის მჭიდრო კომუნიკაციისა და ხალხის თანხმობის გარეშე არ აშენდება.

მეორე: კონრეტულად მესტია-ჭალა ჰესის სამშენებლო პროექტთან დაკავშირებით ჩართული იქნებიან ხალხის ნდობით აღჭურვილი სპეციალისტები, რომელთა არგუმენტირებული შენიშვნები იქნება გათვალისწინებული.

მესამე: მოგეხსენებათ, რომ აღნიშნულმა კომპანიამ ადგილობრივ ბიუჯეტში უნდა შეიტანოს გარკვეული ოდენობის თანხა. ჩვენ მოვითხოვეთ, შეიქმნას ზემო სვანეთის განვითარების ფონდი, სადაც კომპანია დამატებით ყოველწლიურად შეიტანს სოლიდურ თანხას, რომლის მიზნობრიობას თავად განკარგავს ადგილობრივი მოსახლეობა.

მათ საყურადღებოდ, ვინც შემდგარ შეხვედრაში მონაწილეებს, რბილად რომ ვთქვათ უარყოფით კონტექსტში მოიხსენიებს და უკმაყოფილებას გამოთქვამს, შევახსენებთ, ერთი წლის განმავლობაში მიმდინარეობდა მშენებლობა და შესრულებული იყო სამუშაოს 60%-ზე მეტი. ამ ხნის განმავლობაში მოსახლეობას პროტესტის განცდა არ ჰქონია და ალბათ ასეც გაგრძელდებოდა, რომ არა ამ შეხვედრაში მონაწილე პირების ძალისხმევა და მათ მიერ ხალხის გამოღვიძება. სამწუხაროა, როდესაც პიროვნებები ავრცელებენ სიცრუეს, თითქოს ისინი ინფორმირებულნი არ იყვნენ ამ შეხვედრის შესახებ. გაუგებარია, რა მიზანს ემსახურება მათი ქმედება. ეს ნაბიჯი იყო ბეწვის ხიდზე გავლა, მაგრამ ჩვენი აზრით, არსებული ვითარებიდან ერთადერთი გამოსავალი. ღმერთმა უწყის, რომ ჩვენ თავი არ დაგვიზოგია და გავაკეთეთ ის, რაც შევძელით. თუ კი ვინმე თვლის, რომ ამაზე მეტის გაკეთება შეუძლია, ღმერთმა ხელი მოუმართოს“, - ნათქვამია განცხადებაში.

შინაგან საქმეთა მინისტრის პირველმა მოადგილემ, კახა საბანაძემ ეკონომიკისა და ენერგეტიკის, ასევე, სოფლის მეურნეობისა და გარემოს დაცვის მინისტრების მოადგილეებთან, ინვესტორებსა და სვანეთის ადგილობრივ მოსახლეობასთან სამუშაო შეხვედრა გამართა. უწყების ინფორმაციით, განიხილეს მშენებარე ჰესების - „მესტია ჭალა-1-ის“ და „მესტია ჭალა-2-ის“ მშენებლობის უსაფრთხოების საკითხი. 

ჰესების მშენებლობის შეჩერების მოთხოვნით თბილისსა და სვანეთში არაერთხელ გაიმართა საპროტესტო აქციები.