ზუგდიდის შალვა დადიანის სახელობის დრამატული თეატრის დასი დღეს წარმოადგენს ცნობილი ინგლისელი მწერლის, დრამატურგის, ჯონ პრისტალის პიესის მიხედვით დადგმულ სპექტაკლს „ვარდი და გვირგვინი“. ეს არის ამბავი იმაზე, თუ როგორ არ უფრთხილდებიან ადამიანები ცხოვრებას, ერთმანეთს, როგორ ვერ აფასებენ იმას, რაც აქვთ და რა განცდებს უკავშირდება გაცნობიერება ფაქტის, რომ შესაძლოა მათთვის ეს ყოფა უკვე დასრულდა, დრო აღარ აქვთ მეტისთვის. სპექტაკლის რეჟისორის, ბადრი წერედიანის თქმით, სცენაზე გადმოტანილი პიესა სანახაობრივია და კარგი ენით მოთხრობილი. ამბობს, რომ ერთ-ერთი საუკეთესო ნაწარმოებია, რასაც შეხვედრია, რომლის დადგმის სურვილიც ყოველთვის ქონდა.

„ადამიანის ბუნებაზეა, მის დამოკიდებულებაზე, რამდენად ჩვენ არ ვუფრთხილდებით ერთმანეთს მანან, სანამ არ ჩავვარდებით ისეთ მდგომარეობაში, როდესაც ვხვდებით, რომ ყველაზე მეტად თურმე სიცოცხლეს აქვს ფასი და ყველაფერი დანარჩენი უკვე მეორეხარისხოვანია. ძალიან მინდოდა ამ პიესის დადგმა და მიხარია, რომ დღეს პრემიერა გვაქვს. დანარჩენს მაყურებელი შეაფასებს“, - უთხრა რეჟისორმა „ლაივპრესს“.

ბადრი წერედიანის თქმით, სპექტაკლზე დაახლოებით თვე-ნახევრის განმავლობაში მუშაობდნენ. წარმოდგენის ნახვა მსურველებს საღამოს 20:00 საათზე შეეძლებათ. ბილეთის ფასი 5 ლარია.

„ვარდი და გვირგვინის“ ჩვენება მოეწყობა 13 ივნისსაც, იგივე დროს.