რუხში გამოყვანილი კოლხური ბზის ნერგების გადატანა აფხაზეთში ვერ მოხერხდა
არასამთავრობო ორგანიზაცია „აგორა“, რომელმაც რუხში კოლხური ბზის სანერგე მეურნეობის პროექტი განახორციელა, აცხადებდა, რომ აქ გამოყვანილ ნერგებით აფხაზეთის ტერიტორიაზე არსებულ მეურნეობებს მოამარაგებდა, თუმცა ორგანიზაციის კონსულტანტის ირაკლი დარცმელიას განცხადებით, ბზის ნერგების მიწოდება აფხაზეთის ტერიტორიაზე ვერ მოხერხდა.
„ნერგების გადატანა მთელ რიგ სირთულეებთან აღმოჩნდა დაკავშირებული, კონკრეტულ მიზეზებზე ვერ ვისაუბრებ, რადგან როცა აფხაზ კოლეგებთან ერთად ვახორციელებთ პროექტებს, ვცდილობთ მათი უსაფრთხოებიდან გამომდინარე პროექტის დეტალები არ გავახმაუროთ, გეტყვით მხოლოდ იმას, რომ გვქონდა თანამშრომლობა, რომელიც ძირითადად, საკონსულტაციო სახის დახმარება იყო ჩვენი მხრიდან. კომუნიკაცია გარემოს დაცვითი მიმართულებით ამ ეტაპზეც გრძელდება“, - განაცხადა კონსულტანტმა.
მისივე თქმით, ნერგები სანერგედან გამოიტანეს, ნაწილი გაასაჩუქრეს, ნაწილი კი ღია გრუნტში დარგეს.
„ნერგების დიდი ნაწილი არასამთავრობო ორგანიზაცია სენის დახმარებით სკოლებში დარიგდა, ნაწილი აფხაზეთის მთავრობის მიერ გაშენებულ კრწანისის სანერგე მეურნეობაში დავრგეთ, ხოლო დანარჩენი, 3000-4000 კოლხური ბზის ნერგი რუხში“, - გვითხრა ირაკლი დარცმელიამ.
მისივე თქმით, მიწაში გადარგულ ნერგებს სამი წლის განმავლობაში დააკვირდებიან, ამის შემდეგ კი იმუშავებენ კოლხური ბზის ახალი სადედე მეურნეობის გაშენებაზე.
კოლხური ბზის საბაზისო სანერგე მეურნეობა რუხში, 2016 წლის ოქტომბერში გაიხსნა. პროექტის ავტორები აცხადებდნენ, რომ აფხაზეთში უკვე შერჩეულია პარტნიორი ორგანიზაცია, რადგან ორივე მხარეს გათავისებული აქვს, რომ ბზა გადასარჩენია აქაც და აფხაზეთის ტერიტორიაზეც.
კოლხური ბზის გადასარჩენად ქართულ-აფხაზური თანამშრომლობა წარმატებით განხორციელდა, როცა 2016 წლის აპრილის დასაწყისში აფხაზურმა მხარემ ზუგდიდის ბოტანიკური ბაღის ტერიტორიაზე გაშენებული კოლხური ბზის შესაწამლად, ზუგდიდის მერიას ბიოლოგიური პრეპარატი „დიპელი“ გადასცა.