ოპოზიცია: სენაკში მიწის ნაკვეთი კორუფციული გარიგებით იყიდება
აუქციონს სახელმწიფო ქონების ეროვნული სააგენტო აცხადებს.
სენაკში პოლიტიკური ორგანიზაცია „ეროვნული ფორუმის“ წევრი აპოლონ გარუჩავა ამბობს, რომ აღნიშნულ მიწის ნაკვეთის ადგილობრივი მუნიციპალიტეტის საკუთრებაში გადასაცემად, მან ხელმოწერები არაერთხელ შეაგროვა, თუმცა უარი მიიღო. მიწის ნაკვეთზე აუქციონის გამოცხადება უჩენს ეჭვს, რომ მისი შეძენა ხელისუფლებასთან დაახლოებულ პირებს სურთ.
„მე რამდენჯერმე მივმართე ადგილობრივ ხელისუფლებას, რომ მიწის ნაკვეთის მუნიციპალიტეტის საკუთრებაში გადაცემა მოეთხოვა, რათა შემდეგ აქ ისევ ფეხბურთის სტადიონი გაკეთებულიყო, მაგრამ უარი მივიღე. ახლა კი, უცებ აუქციონის წესით ტერიტორიის კერძო პირზე გადაცემა ხდება. მაქვს ინფორმაცია, რომ ხელისუფლებასთან დაახლოებული პირი დგას აუქციონის უკან. ელიტარულ კორუფციასთან გვაქვს საქმე. ამიტომ გავერთიანდით ამ ქუჩაზე მცხოვრები რამდენიმე მოქალაქე და ვაპირებთ, რომ შევიძინოთ ეს ნაკვეთი აუქციონზე“, - გვითხრა აპოლონ გარუჩავამ.
აღნიშნული მიწის ნაკვეთის მუნიციპალიტეტისთვის გადაცემის მოთხოვნით, მან სენაკის მერს მიმდინარე წლის მარტის თვეშიც მიმართა, რაზეც ასე უპასუხეს:
„გაცნობებთ, რომ თქვენს განცხადებაში მითითებული ტერიტორიის ადგილობრივი თვითმმართველობის საკუთრებაში გადაცემის შემთხვევაში, მის მოსაწესრიგებლად და სპორტული მოედნის მოსაწყობად სამუშაოები უნდა განხორციელდეს საკუთარი სახსრებით, რასაც მოკლებულები ვართ, 2018 წლის ბიუჯეტში სათანადო თანხის არქონისა და შესაბამისად, მისი გაუთვალსწინებლობის გამო. აღნიშნულიდან გამომდინარე, თქვენს თხოვნას ვერ ვაკმაყოფილებთ“, - ნათქვამია მერის, ლევან კუპრეიშვილის საპასუხო წერილში.
სახელმწიფო ქონების ეროვნული სააგენტოს მიერ მიწის ნაკვეთზე გამოცხადებული აუქციონის ვადა დღეს 17: 00 საათზე იწურება.