მდინარე ნენსკრამ ჭუბერში ადგილობრივი მცხოვრების, სოსო ჩხეტიანის სახლი წაიღო. ეს ინფორმაცია „ლაივპრესს“ სამეგრელო-ზემო სვანეთის გუბერნატორის პრესსამსახურმა, პაატა ლაგვილავამ დაუდასტურა. მისივე ცნობით, 5 ივლისს სტიქიამ სამი სახლი დაანგრია. თუმცა დროულად მოხდა ოჯახების ევაკუაცია, რადგან სახლები მდინარესთან ახლოს მდებარეობის გამო იქ დარჩენა სახიფათო იყო. დღეს ეს ადამიანები უსაფრთხო ადგილას, მეზობლებთან და ნათესავებთან აფარებენ თავს. პაატა ლაგვილავასვე ცნობით, ნენსკრას დონე არ მომატებულა.

რაც შეეხება გზას, გუბერნატორის პრესსამსახური ამბობს, რომ ნაშალი რაც ჩამოიტანა მდინარემ, გაწმენდილია. ტექნიკა კვლავაც განაგრძობს მუშაობას:

„არის ადგილები, სადაც გზა მთლიანად წაღებულია, თუმცა შემოვლითი გზები გაკეთებულია რამდენიმე მონაკვეთზე და კეთდება. ხდება გამაგრებითი სამუშაოები, ქვა-ღორღის ყრიან პრობლემურ მონაკვეთებზე. მთავარი ხიდი, რომელიც აკავშირებდა ჭუბერს გარესამყაროსთან, არსებობს. არ შეუძლიათ გადაადგილება პატარა მანქანებს, თუმცა ჯიპებს და მსგავს დიდი მანქანებს ჩვეულებრივ შემოსვლა, რადგან დამატებით ასაქცევი გზა გაკეთდა“.

პაატა ლაგვილავას თქმით, ამ ეტაპზე ზარალის შესახებ ინფორმაცია არ აქვთ.

ჭუბერში ამ წუთებში არ წვიმს.

სტიქიის ზონაში სალიკვიდაციო სამუშაოები დილიდან განახლდა.

უხვი ნალექის შედეგად, სოფელ ჭუბერში მთის ნაწილის ჩამოშლამ მდინარე ნენსკრას ადიდება გამოიწვია. მდინარის კალაპოტიდან გადმოსვლის გამო დაიტბორა მიმდებარე ტერიტორია, რამაც ათეულობით თემი გარესამყაროს მოწყვიტა, უხვმა ნალექმა ჩამორეცხა სოფლებს შორის დამაკავშირებელი საავტომობილო გზები. ღვარცოფის სალიკვიდაციოდ მოხდა დამატებითი სამაშველო ჯგუფებისა და ტექნიკის მობილიზება უახლოესი ლოკაციებიდან.

მესტიის მერის, კაპიტონ ჟორჟოლიანის ინფორმაციით, ცენტრს არცერთი სოფელი არაა მოწყვეტილი.

ვიდეოში ასახულია რა ვითარება იყო ჩხეტიანების საკარმიდამო ნაკვეთში. მასალა აღებულია ხათუნა ჩხეტიანის "ფეისბუკ" გვერდიდან.