ეპარქია დაფინანსების შემცირებაზე საკრებულოს დასახელებულ მიზეზს არ ეთანხმება
საკრებულოს გადაწყვეტილების შესახებ „ლაივპრესის“ მიერ მომზადებულ მასალას ეპარქია გამოეხმაურა და განაცხადა, რომ საკრებულოს თავმჯდომარის მოადგილე ბესიკ ჭეჟიას განცხადება, რომ ეპარქიამ ვერ წარმოადგინა ხარჯთაღრიცხვა, სიმართლეს არ შეესაბამება.
„თქვენი ინტერნეტგამოცემის საშუალებით ჩვენთვის ცნობილი გახდა, რომ ზუგდიდის მუნიციპალიტეტის თავმჯდომარის მოადგილის, ბატონ ბესიკ ჭეჟიას განცხადებით, ზუგდიდისა და ცაიშის ეპარქიას ნაცვლად 494 000(ოთხას ოთხმოცდა თოთხმეტი) ათასი ლარისა, (კორცხელის დედათა მონასტერი, ზუგდიდის ივერიის ღვთისმშობლის მონასტერი, ეპარქიაში ეკლესიებისა და ტაძრების) სამშენებლო-სარეაბილიტაციო სამუშაოებისათვის გამოეყოფა 200 000 (ორასი ათასი)ლარი. იმ მიზეზით, რომ ეპარქიამ ვერ წარადგინა ხარჯთაღრიცხვა და წლის ბოლომდე ვერ ითვისებს გამოყოფილ თანხებს, რაც სიმართლეს არ შეესაბამება. საზოგადოებას გვინდა ვამცნოთ, რომ 2018.19.02 N7 წერილით მივმართეთ ადგილობრივ ხელისუფლებას 2018 წლის ზუგდიდის მუნიციპალიტეტის ბიუჯეტში დამტკიცებული 400 000 (ოთხასიათასი) ლარის, გამოყოფაზე. მიუხედავად ჩვენი არაერთი მიმართვისა, ადგილობრივ ხელისუფლებასა და ეპარქიას შორის გაფორმებულიყო მემორანდუმი, მხარეთა შორის დღემდე არ არის ხელმოწერილი.
ჩვენთვის ადგილობრივი ხელისუფლებიდან ოფიციალური წერილით ხარჯთაღრიცხვის წარდგენის შესახებ არავის არ მოუმართავს. ასევე გვინდა განვაცხადოთ, რომ თითქოს ბიუჯეტიდან გამოყოფილ თანხებს დადგენილ ვადებში ეპარქია ვერ ითვისებს, არ შეესაბამება სიმართლეს. ასევე ავღნიშნავთ, რომ მიმდინარე 2018 წლის განმავლობაში ერთი თეთრიც არ არის ჩარიცხული ეპარქიის ანგარიშზე“, - ნათქვამია განცხადებაში.
ტექსტს თან ერთვის ზუგდიდის საკრებულოს თავმჯდომარის მამუკა წოწერიას სახელზე გაგზავნილი წერილი, სადაც აღნიშნულია ეკლესიები, რომელთაც ბიუჯეტიდან გამოყოფილი თანხა უნდა მოხმარებოდა.
დღეს გამართულ სხდომაზე მუნიციპალიტეტის საკრებულოს თავმჯდომარის მოადგილე ბესიკ ჭეჟიამ განაცხადა, რომ ზუგდიდის მშენებარე ტაძრისა და კორცხელის მონასტრისთვის გამოყოფილი 494 ათასი ლარის ნაცვლად, ეპარქიას 200 ათასს მისცემენ.
ეპარქიის განცხადების შემდეგ, რომ მათთვის ხარჯაღრიცხვის მოთხოვნით ხელისუფლებიდან არავის მიუმართავს, ბესიკ ჭეჟიამ თქვა, რომ ხელისუფლების მხრიდან ამასთან დაკავშირებით დამატებითი კომენტარი მოგვიანებით გაკეთდება.