ჭუბერში, სტიქიის ზონაში მიმდინარე სალიკვიდაციო სამუშაოებში მოხალისეები ჩაერთვნენ. დაზარალებულ თემში უკვე იმყოფებოდნენ მოქალაქეები თბილისიდან, დღეს და მიმდინარე კვირის განმავლობაში მათ ქვეყნის სხვადასხვა რეგიონიდან ელოდებიან. ჭუბერში მერის წარმომადგენელ ნინო ვიბლიანის თქმით, მათ სამეგრელოს მუნიციპალიტეტების შემდეგ, უკვე თბილისის მუნიციპალიტეტის გამგეობებიდან მიიღეს ჰუმანიტარული დახმარება. ასევე სხვადასხვა ორგანიზაციიდან, გარემოს და სოფლის მეურნეობის სამინისტროსგან. ახლა კი, როგორც განმარტა, მიმდინარეობს მოსახლეობის აღწერა, რათა მათზე ეს ყველაფერი გადანაწილდეს.

ამ წუთებში, მერის წარმომადგენელმა აღნიშნა, რომ ნაპირსამაგრი და გამაგრების სამუშაოები გრძელდება. პარარელურად სამხედრო ხიდის მონტაჟი, რომელიც კიდევ ორ დღეს გასტანს.

რაც შეეხება ელექტროენერგიას, ჭუბერში მისი მიწოდება სრულად არ აღმდგარა, რადგან ნინო ვიბლიანის თქმით, გადაადგილება ჯერაც პრობლემაა. თუმცა განმარტა ისიც, რომ ენერგო-პრო სტიქიის ზონაში ამ სამუშაოებს აქტიურად განაგრძობს.

უხვი ნალექის შედეგად, სოფელ ჭუბერში მთის ნაწილის ჩამოშლამ მდინარე ნენსკრას ადიდება გამოიწვია. მდინარის კალაპოტიდან გადმოსვლის გამო დაიტბორა მიმდებარე ტერიტორია, რამაც ჩამორეცხა სოფლებს შორის დამაკავშირებელი საავტომობილო გზები და ათამდე თემი გარესამყაროს მოწყვიტა.