ბრიუსელში გაიმართა აშშ-ის პრეზიდენტ დონალდ ტრამპის პრესკონფერენცია, სადაც მან სხვა საკითხებთან ერთად, ნატო-საქართველოს ურთიერთობებზეც ისაუბრა. „ისინი აქ იყვნენ და ძალიან დადებითი შთაბეჭდილება დატოვეს. ჩვენ მოვისმინეთ მათი გასაჭირი. საქართველოსთან დაკავშირებით მძიმე ვითარებაა, მაგრამ მათ შეხვედრაზე ძალიან დადებითი შთაბეჭდილება დატოვეს“, - აღნიშნა აშშ-ის პრეზიდენტმა.

ჟურნალისტის შეკითხვაზე, რას ფიქრობს ის ნატოში საქართველოს მომავალ წევრობაზე, დონალდ ტრამპმა თქვა: „გარკვეულ ეტაპზე მათ ექნებათ შანსი, მაგრამ არა ახლა".

თავის მხრივ, შემაჯამებელ პრესკონფერენციაზე ნატოს გეენრალური მდივნის, იენს სტოლტენბერგის განცხადებით, ისინი განაგრძობენ მუშაობას იმისათვის, რომ საქართველო ნატოში გასაწევრიანებლად მოამზადონ.

„ჩვენ შევხვდით საქართველოსა და უკრაინის პრეზიდენტებს და განვიხილეთ მათი ქვეყნების სუვერენიტეტისა და ტერიტორიულ მთლიანობის მისამართით რუსეთისგან მომავალი საერთო საფრთხეები. დღეს შევთანხმდით ერთობლივი მუშაობის გაგრძელებაზე იმისათვის, რომ საქართველო მოვამზადოთ ნატოში გასაწევრიანებლად“, - განაცხადა ნატოს გენერალურმა მდივანმა.

მანამდე გამოქვეყნდა საქართველოსთან დაკავშირებული დეკლარაციის ტექსტი, რომელიც, ბრიუსელის სამიტის ფარგლებში, ნატო-საქართველოს კომისიის სხდომაზე დამტკიცდა. მასში ნათქვამია, რომ ჩრდილოატლანტიკურ ალიანსში გასაწევრიანებლად საქართველოს აუცილებლად დასჭირდება გაწევრიანების სამოქმედო გეგმის (MAP) მიღება.

ინფორმაციას რადიო თავისუფლება აქვეყნებს.