სუბარი სვანეთში ხე-ტყის მომპოვებლებზე: ამ ეტაპზე მათზე არ გავრცელდება სანქცია
„დაახლოებით 10 დღეში, მთავრობასთან ერთად, ის ადამიანები, ვისაც ხელეწიფება პრობლემების გადაჭრა, ჩამოვლენ და ვიმუშავებთ პრობლემის მოგვარების გრძელვადიან გზებზე. ეს სოფლები ჯერ კიდევ საბჭოთა პერიოდიდან მუშაობენ ხე-ტყეზე, რომელიც მათი შემოსავლის ერთადერთი წყაროა. სამწუხაროდ, ვერ მოვახერხეთ, რომ ეს ყველაფერი მოგვექცია ლეგალურ ჩარჩოებში და ხშირია, რომ ეს ადამიანები და მათი საქმიანობა კანონის ზღვარზეა ან უკანონო. ამ უკანონობას ხშირად ჩვენც ვუწყობთ ხელს, ზოგჯერ იმით, რომ პოლიტიკა ვერ გავატარეთ დროულად, თუმცა ზოგჯერ არის ობიექტური მიზეზები, - აღნიშნა სოზარ სუბარმა.
ზუგდიდი-ჯვარი-მესტიის მიმართულებით რამდენიმე საათით საავტომობილო მოძრაობა ჩაკეტილი იყო. 26 ივლისს, დილიდან ჭუბერისა და ხაიშის მცხოვრებლები აქციას მართავდნენ. ისინი ხე-ტყის უკანონო მოპოვებასთან დაკავშირებით საგამოძიებო სამსახურის მუშაობას აპროტესტებდნენ. 26 ივლისსს ფინანსთა სამინისტროში ბრიფინგზე ითქვა, რომ „საგამოძიებო სამსახურები მთელი ქვეყნების მასშტაბით ინტენსიურად ატარებენ ღონისძიებებს ხე-ტყის უკანონო მომპოვებელთა გამოვლინების, გაყალბებული დოკუმენტების გამოყენებით ხის მასალის რეალიზატორთა და კანონდარღვევით მოქმედი ხის სახერხი საამქროების გამოვლენა მხილების მიზნით“. სამინისტროს საგამოძიებო სამსახურის თბილისის მთავარი სამმართველოს უფროსის, გიორგი ელგანდაშვილის განმარტებით, ხაიშში სპეცრაზმის შეყვანა საჭირო გახდა, რადგან საგამოძიებო სამსახურის თანამშრომლების უსაფრთხოება დაცულიყო და მათ საქმიანობის სრულყოფილად შესრულების შესაძლებლობა მისცემოდათ.