სენაკსა და მარტვილში სტიქიის შედეგებს რეგიონალური განვითარებისა და ინფრასტრუქტურის მინისტრის მოადგილეები გაეცნენ.

ილია ბეგიაშვილმა სენაკში და გიგა კაციამ მარტვილში სალიკვიდაციო სამუშაოების მიმდინარეობა დაათვალიერს. ბეგიაშვილმა ჟურნალისტებს განუცხადა, რომ სტიქიის ზონებში შექმნილია სპეციალური კომისიები, რომლებიც რამდენიმე დღეში დაადგენენ ზარალის ოდენობას:

"გვეცოდინება რა ზარალი მიადგა როგორც ინფრასტრუქტურას, ისე მოსახლეობას. დღის განმავლობაში არაერთი არასწორი ინფორმაცია გავრცელდა იმასთან დაკავშირებით, თუ რა მდგომარეობაა მუნიციპალიტეტების გზებზე. ამიტომაც, რეგიონული განვითარებისა და ინფრასტრუქტურის სამინისტროში შეიქმნა სამუშაო ჯგუფი, სადაც სრულიად საქართველოდან იყრის ინფორმაცია თავს. ნებისმიერ ადამიანს შეუძლია მიმართოს სამინისტროს და მიიღოს ინფორმაცია, რომ ზედმეტი პანიკა არ იყოს", - განაცხადა ილია ბეგიაშვილმა სენაკში. 

სტიქიის ზონაში ასევე იმყოფებოდნენ სამეგრელო ზემო-სვანეთის გუბერნატორის მოვალეობის შემსრულებელი, მუნიციპალიტეტების მერები და ადგილობრივი თვითმართველობის შესაბამისი სამსახურების წარმომადგენლები.
სამეგრელო-ზემო სვანეთის გუბერნატორის პრესსამსახურის ინფორმაციით, გაწმენდით სამუშაოებში მონაწილეობას იღებენ საგანგებო სიტუაციების სამსახურის თანამშრომლები, ადგილობრივი თვითმმართველობის წარმომადგენლები და მოხალისეები. სენაკში ჭავჭავაძისა და მიმდებარე ქუჩებზე უხვმა ნალექმა საცხოვრებელი სახლების პირველი სართულები დატბორა. ასევე, პრობლემები შეიქმნა სოფელ ძველ სენაკში, ხორშში, კოტიანეტში, ლეძაძამეში, უშაფათში, სორტში და სხვა ადმინისტრაციულ ერთეულებში. ადიდებულმა მდინარემ დაანგრია ლეძაძამე-კვაუთის დამაკავშირებელი საავტომობილო ხიდი და ბეთლემის საცალფეხო ხიდი. ძლიერმა წვიმამ პრობლემები შექმნა მარტვილის მუნიციპალიტეტშიც. ადიდებულმა ღელეებმა საკარმიდამო ნაკვეთები და საცხოვრებელი სახლები დატბორა: ბანძაში, დიდი ჭყონში, გურძემში, სალხინოში, ტალერში, აბედათში, ნაჯახაოში, დოშაყეში, ნახუნაუსა და კურზუში. ხუნწში მეწყრული პროცესების განვითარების შედეგად ჩამოინგრა რომან თოფურიას საცხოვრებელი სახლი, ოჯახი გადაყვანილია უსაფრთხო ადგილას. დაზარალებულებს საცხოვრებელ ფართს მარტვილის მუნიციპალიტეტის მერია უქირავებს. ძლიერმა წვიმამ, ასევე პრობლემები შეუქმნა აბაშის, ჩხოროწყუს, ზუგდიდისა და ხობის მუნიციპალიტეტებს.

ფოტოები ეკუთვნის გუბერნატორის ადმინისტრაციას.