საქართველოში ფერმათა და ფერმერთა რეგისტრაცია დაიწყო. მის ფარგლებში დაგეგმილია ქვეყნის მასშტაბით სასოფლო-სამეურნეო საქმიანობით დაკავებულ პირთა აღრიცხვა, რამაც უნდა შექმნას საინფორმაციო ბაზა და შესაძლებლობა იმისთვის, რომ მიზნობრივი და სხვადასხვა მასტიმულირებელი პროექტის ან პროგრამის განხორციელებისთვის სამიზნე ჯგუფები სწორად შეირჩეს.

მთავრობის ინფორმაციით, პირველ ეტაპზე დაუკავშირდებიან მხოლოდ ისეთ პირებს, რომელთაც რეგისტრირებულ საკუთრებაში/სარგებლობაში აქვთ სასოფლო-სამეურნეო დანიშნულების მიწის ნაკვეთები. მათი ჯამური ფართობი უნდა შეადგენდეს არანაკლებ 0,25 ჰა-ს. ამავდროულად, ისინი უნდა იყვნენ სახელმწიფოს მიერ განხორციელებული რომელიმე სასოფლო-სამეურნეო პროგრამის ბენეფიციარები, ან სარგებლობენ სახელმწიფოს მიერ შეთავაზებული რომელიმე სასოფლო-სამეურნეო მომსახურებით.

„რეესტრში საკუთარი ინიციატივით დარეგისტრირების მსურველ პირებს დარეგისტრირება შეუძლიათ სააგენტოს ცხელი ხაზის მეშვეობით, სადაც დარეკვის და საკუთარი ფერმერული მეურნეობის შესახებ ინფორმაციის მიწოდების შემთხვევაში, რომელიც დადასტურდება გადამოწმების შედეგად, პირი ავტომატურად დარეგისტრირდება რეესტრში“, - ნათქვამია მთავრობის მიერ გავრცელებულ განცხადებაში.