ჭუბერში დასრულდა მთავრობის წარმომადგენლებსა და ადგილობრივ მოსახლეობას შორის შეხვედრა. შეხვედრის მონაწილე გარი ჩხვიმიანმა „ლაივპრესს“ უთხრა, რომ შედეგით კმაყოფილია და შემდგომ ნაბიჯებს ხელისუფლებისგან ელოდება. მისი თქმით, რას ითხოვდნენ და რისი საჭიროების წინაშე იდგნენ, საკითხები გადაწყვეტილების მიმღებ პირებს მიაწოდეს. მათ შორის თანხმობა მიიღეს იაფი და გრძელვადიანი სესხებით მხარდაჭერაზე, რაც მოსახლეობას სხვადასხვა იდეის განხორციელებაში უნდა დაეხმაროს.

„მე მინდა ფული დაბალპროცენტიანი, გრძელვადიანი. დავდებ პროექტს, თუნდაც იდეის სახით. ამ პროექტშიც უნდა დამეხმაროს სახელმწიფო, რომ იდეა პროექტად მაქცევინოს. ნებისმიერი საქმე, რომელიც განავითარებს რეგიონს, თანადაფინანსებისთვის მზად არიან“, - გვითხრა გარი ჩხვიმიანმა.

მისი განმარტებით, იმ რეალობას, რა რეალობაშიც იმყოფებიან, შესაძლებლობები უნდა მოარგონ. მაგალითად, განავითარონ ტურიზი და შესაბამისი ინფრასტრუქტურა. დარეგულირდეს ხე-ტყის მოპოვების საკითხიც, რადგან მოსახლეობამ უნდა გამოიზამთროს.

„ეკოტურიზის დასაფუძნებლად რამდენიმე წელია ვმუშაობ. ადრე არ იყო ხელშეწყობა. ალბათ ახლა გამოიღვიძებენ. ველოდებით შეტყობინებას მთავრობისგან“, - განმარტა სვანეთის მკვიდრმა.

თავის მხრივ, სოზარ სუბარმა აღნიშნა, რომ მთავრობის წარმომადგენლებმა შეხვედრაზე კონკრეტული წინადადებები წარადგინეს, რომელთაგან ნაწილის სწრაფად გადაწყვეტა შეიძლება, დანარჩენი კი გრძელვადიან განვითარებას ეხება.

„მოვისმინეთ კონკრეტული ადამიანების პრობლემა. მაგალითად ვიღაცის მანქანა არის გაჩერებული, არ უბრუნებენ. ჩემი პასუხი ამ შემთხვევაში მარტივია, ჩავალ თბილისში და მოვიკითხავთ, თუ იქნება კანონიერი დავაჩქარებთ დაბრუნებას, თუ დარღვევაა, დარღვევით არავინ უნდა იმუშაოს. კანონი უნდა იყოს ყველასთვის კანონი. ამნისტია შესაძლებელია, თუმცა ეს უნდა იყოს ერთიანი მთელს ქვეყანაში და განსხვავებული მიდგომა ქვეყნის სხვადასხვა ნაწილში ვერ იქნება”, - განაცხადა სოზარ სუბარმა.

სოფელ ჭუბერში, ადგილობრივ მოსახლეობას მთავრობის ადმინისტრაციის რეგიონული განვითარების სამსახურის ხელმძღვანელი სოზარ სუბარი, იუსტიციის მინისტრი თეა წულუკიანი და გარემოს დაცვის მინისტრი ლევან დავითაშვილი შეხვდნენ. მათ პრობლემების მოსმენის პარარელურად, შეკრებილებს ახალ სატყეო კოდექსთან დაკავშირებით ინფორმაცია მიაწოდეს.

შეხვედრას მათთან ერთად, სამეგრელო-ზემო სვანეთის გუბერნატორის მოვალეობის შემსრულებელი კობა ქანთარია, პარლამენის წევრი ვიქტორ ჯაფარიძე, მესტიის მერი კაპიტონ ჟორჟოლიანი და სატყეო დეპარტამენტის წარმომადგენლები ესწრებოდნენ.

მიმდინარე წლის 26 ივლისს შემოსავლების სამსახურმა ხე-ტყის გადამამუშავებელი საამქროების შემოწმება დაიწყო, რასაც ადგილობრივებსა და სამართალდამცველებს შორის დაპირისპირება მოყვა.