კახა კუკავა: დაუნდობელი ბრძოლა ნარკოტიკებს, მათ შორის მარიხუანას [ვიდეო]
კახა კუკავას თქმით, სასამართლოს გადაწყვეტილების მავნებლობაზე დღეს ოპოზიცია არ საუბრობს, რადგან სინამდვილეში ყველანი „ერთნი არიან“:
„მე ვიქნები გამონაკლისი და მექნება მკაფიო პოზიცია - სახელმწიფომ უნდა გამოუცხადოს დაუნდობელი ბრძოლა ნარკოტიკებს. მათ შორის არანაირი მსუბუქი და კლუბური ნარკოტიკი არ არსებობს. მათ შორის მარიხუანას. ჩვენს ახალგაზრდებს, რომლებიც თუნდაც ეწევიან, უნდა ავუხსნათ, რომ ეს თვითდაზიანება კი არ არის, რაც ბიძინა ივანიშვილს და ლიბერალურ მედიას გონია, თვითგანადგურებაა“.
პრეზიდენტობის კანდიდატის თქმით, ნარკოტიკების წინააღმდეგ საბრძოლველად არ არის აუცილებელი მომხმარებელთა დაპატიმრება, თუმცა ახალ თაობას უნდა აუხსნან, გართობაა ღვინის დალევა, ცეკვა, სიმღერა, ნარკოტიკები კი სიკვდილი.
კახა კუკავას განმარტებით, ეს იქნება მათი განსხვავებული ხედვა პრეზიდენტობის დანარჩენი კანდიდატებისგან.
„თავისუფალი საქართველოს“ ლიდერმა საარჩევნო კამპანია ზუგდიდიდან დაიწყო, სადაც პარტიის პრეზიდენტობის კანდიდატად წარადგინეს.
საქართველოში მარიხუანას მოხმარება ლეგალური გახდა. საკონსტიტუციო სასამართლოს მიერ 30 ივლისს მიღებული გადაწყვეტილების თანახმად, მარიხუანას მოხმარებაზე სანქციები გაუქმდა.