სამეგრელო-ზემო სვანეთის გუბერნატორის წარდგენაზე გაკეთებულ განცხადებებს არასამთავრობო ორგანიზაციების მხრიდან კრიტიკა მოჰყვა. მათი ნაწილი მიიჩნევს, რომ რეგიონის ახალი გუბერნატორი, ალექსანდრე მოწერელია თვითმმართველობის საქმიანობაში ღიად ჩაერია. განსაკუთრებით ცუდად ენიშნათ ახალი გუბერნატორის ფრაზა, „მოსახლეობის ფართო მონაწილეობით ადგილობრივი თვითმმართველობის საქმიანობაზე კონტროლის გააქტიურების“ შესახებ. კრიტიკის საგნად იქცა და აღქმულ იქნა, „მერების დატუქსვად“, შინაგან საქმეთა მინისტრის გიორგი გახარიას სიტყვები: „არავინ მოითმენს, რომ სამეგრელოში არ იყვნენ ხუთოსნები“.

საქართველოს რეფორმების ასოციაციის (GRASS) ანალიტიკოსი ეგნატე შამუგია აცხადებს, რომ დღეს სახელმწიფო რწმუნებულის ადმინისტრაციაში შეკრებილი მერები და საკრებულოს თავმჯდომარეები შს მინისტრმა ღიად დატუქსა. გუბერნატორს კი, რომელიც ანალიტიკოსის სიტყვებით, სახელმწიფო რწმუნებულია და წარმოადგენს ცენტრალური ხელისუფლების ერთგვარ მმართველობის ორგანოს, არანაირი უფლება არ აქვს მუნიციპალიტეტების საქმიანობაში ჩარევის, დღეს კი ეს სახეზე იყო. ეგნატე შამუგიას თქმით, გუბერნატორის მხრიდან მერების საქმიანობის კრიტიკა, არის მათზე ერთგვარი ზეწოლაც.

„ადგილობრივი თვითმმართველობის კოდექსით და საქართველოს კონსტიტუციით, პირდაპირი წესით არჩეული მერის, საკრებულოს თავმჯდომარის თუ მუნიციპალიტეტის ნებისმიერი ორგანოს დამოუკიდებლობა გარანტირებულია და არავის, მინისტრი იქნება ეს თუ პრემიერ-მინისტრი, უფლება, რაიმე დავალება გასცეს მერზე ან საკრებულოს თავმჯდომარეზე და მითუმეტეს, რაღაც მუქარის შემცველი განცხადებებით მიმართოს, მათ არ აქვთ. ეს არის პირდაპირი მუქარა, მითუმეტეს შს მინისტრის მხრიდან, რათა ისინი იყვნენ ხელისუფლების ერთგულები და მორჩილები“, - განუცხადა „ლაივპრესს“ ეგნატე შამუგიამ.

„საქართველოს ახალგაზრდა იურისტთა ასოციაციაში“ მიაჩნიათ, რომ განცხადებები, რომლებიც სახელმწიფო რწმუნებულის ადმინისტრაციაში მოისმინა საზოგადოებამ, არ უნდა კეთდებოდეს მთავრობის წარმომადგენლების, ამ შემთხვევაში გუბერნატორის და შინაგან საქმეთა მინისტრის მხრიდან:

„გუბერნატორმა გააკეთა შემდეგი შინაარსის განცხადება, ვციტირებ: „ჩვენი ამოცანაა, რომ მოსახლეობის ფართო მონაწილეობით გავააქტიუროთ კონტროლი ადგილობრივი თვითმმართველობის საქმიანობაზე“, - მსგავსი შინაარსის განცხადებები, როდესაც მოცემულ შემთხვევაში გუბერნატორს არ გააჩნია უფლება თვითმმართველობაზე განახორციელოს კონტროლი, როცა თვითმმართველობა წარმოადგენს დამოუკიდებელ ორგანოს, რა თქმა უნდა არის დაუშვებელი. ამ კონტექსტში, როცა მსგავსი შინაარსის განცხადება კეთდება, საზოგადოების მხრიდან ეს შეიძლება აღქმული იყოს, როგორც თვითმმართველობის საქმიანობაში ჩარევა. რაც შეეხება შინაგან საქმეთა მინისტრის განცხადებას, ისიც შესაძლებელია აღქმული იყოს, როგორც ზეწოლა თვითმმართველობის საქმიანობაზე“, - განაცხადა საიას ზუგდიდის ოფისის ხელმძღვანელმა ჯემალ ჭკადუამ.

„საერთაშორისო გამჭვირვალობა საქართველოს“ ზუგდიდის ოფისის კოორდინატორმა გვითხრა, რომ კომენტარს ამ თემაზე მოგვიანებით გააკეთებს. თუმცა მანამდე არჩილ თოდუა ფეისბუკზე გამოეხმაურა გუბერნატორის წარდგენას. მანაც ეს განცხადებები აღიქვა, როგორც მერების დატუქსვა:

„ვუსმინე სამეგრელოს ახალი გუბერნატორის წარდგენას (გახარიამ და სუბარმა წარადგინეს) და ისე ისაუბრეს წარმდგენებმაც და ახალმა გუბერნატორმაც, რომ თითქოს პირდაპირი წესით არჩეულ მერებს უფროსი დაუნიშნეს და „ცუდად თუ მოიქცევით, ყურებს აგიწევთო“! მერების დიდ ნაწილზე განსაკუთრებული წარმოდგენის არა ვარ, მაგრამ ესეთი რამ არ შეიძლება, რაც არ უნდა ცუდი იყოს მერი. ერთის მხრივ, გუშინ დეცენტრალიზაციის ახალ გეგმაზე დაიწყო რეგიონულმა სამინისტრომ მუშაობა, მეორეს მხრივ კი მერებს პირდაპირ თუ ირიბად „აკაჩავებენ“. საერთოდ წარმოდგენა არ აქვს ამ ხალხს, რა არის ადგილობრივი თვიმმართველობა. არსებული ფორმით გუბერნატორის ინსტიტუტის შენარჩუნებას არ აქვს არანაირი აზრი და მავნებლობაა!“,-წერს არჩილ თოდუა ფეისბუკის საკუთარ გვერდზე.

ალექსანდრე მოწერელია დღეს სახელმწიფო რწმუნებულის ადმინისტრაციაში, მთავრობის ადმინისტრაციის რეგიონული სამსახურის უფროსმა სოზარ სუბარმა და შს მინისტრმა გიორგი გახარიამ წარადგინა. „გულწრფელად გპირდებით, სრული გარანტიით, რომ განსაკუთრებული ყურადღება მთავრობის მხრიდან ექნება სამეგრელოს. განსაკუთრებით ზუგდიდს, და არავინ მოითმენს იმას, რომ აქ არ იყვნენ ხუთოსნები, - განაცხადა შს მინისტრმა. ალექსანდრე მოწერელია სიტყვებით კი, ადგილებზე ხელისუფლება რიგ შემთხვევებში არ იყენებს მის ხელთ არსებულ სრულ უფლებამოსილებას, რათა მნიშვნელოვანი საკითხები გადაიჭრას. „ჩვენი ამოცანაა, მოსახლეობის ფართო მონაწილეობით გავააქტიუროთ კონტროლი ადგილობრივი თვითმმართველობის საქმიანობაზე“,- განაცხადა გუბერნატორმა. წარდგენის სრული ჩანაწერი შეგიძლიათ იხილოთ აქ.