სამეგრელო-ზემო სვანეთის გუბრენატორი ალექსანდრე მოწერელია დღეს საჯარო სკოლების დირექტორებსა და პედაგოგებს შეხვდა. დირექტორებმა ისაუბრეს სკოლებში არსებულ საჭიროებებზე, სათამაშო, სპორტული მოედნების, სველი წერტილების, გათბობის პრობლემებზე. საუბარი შეეხო პედაგოგთა კვალიფიკაციის ამაღლებას და მოსწავლეების პროფესიული უნარების განვითარებასაც.

ახალაბასთუმნის სკოლის პედაგოგმა ცირა გულუამ პედაგოგთა კვალიფიკაციის ამაღლებაში გუბერნატორს დახმარება სთხოვა. მისი განცხადებით, გადამზადების მიზნით ზუგდიდში უნდა არსებობდეს მასწავლებელთა სახლი.

მე-15 სკოლის ყოფილმა დირექტორმა კლარა ჭანტურიამ თქვა, რომ ის სამსახურიდან უკანონოდ გაათავისუფლეს და სახელმწიფო რწმუნებულს დახმარების თხოვნით მიმართა. მან მადლობა გადაუხადა ალექსანდრე მოწერელიას, რომ პედაგოგებს პრობლემებზე სასაუბროდ შეხვდა.

„ჩვენ დღეს გუბერნატორი დავინახეთ ხალხო, გვქონია ჩვენ ასეთი შემთხვევა? გუბერნატორი ასე ცოცხლად, საღსალამათი, ცოცხალი, ახალგაზრდა, უმშვენიერესი ადამიანი რომ დავინახეთ, მადლობა ამისთვის“, - აღნიშნა მან.

თავის მხრივ, სახელმწიფო რწმუნებულის თქმით, ყველა საკითხი, რაზეც გამომსვლელებმა ისაუბრეს, ჩაინიშნა და პედაგოგებს კიდევ შეხვდება.

„პირველ რიგში ეს იყო გაცნობითი ხასიათის შეხვედრა. გავეცანით პრობლემებს, რომელიც მნიშვნელოვანია. რაც დღეს ჩამოთვალეს, ეს უმწვავესი პრობლემებია. რა თქმა უნდა, სხვა პრობლემებიც არსებობს, მაგრამ პირველ რიგში ჩვენ რეაგირება უნდა მოვახდინოთ ინფრასტრუქტურის მოგვარებაზე. რაც შეეხება ფინანსებს, ეს უკვე სამუშაო პროცესია, როცა ჩვენ დავიწყებთ ამ საკითხების საგნობრივად შესწავლას, დარწმუნებული ვარ გამოჩნდება საშუალება, რითაც ჩვენ შევძლებთ ეტაპობრივად განვახორციელოთ სკოლების რეაბილიტაცია. ვაპირებთ, ასეთ შეხვედრებს მივცეთ რეგულარული ხასიათი, ვისაუბროთ შესრულებულ სამუშაოებზე და დავგეგმოთ ახალი პრობლემების მოგვარება“, - განაცხადა გუბერნატორმა.