ზუგდიდის თეატრმა სამხატვრო ხელმძღვანელის წინააღმდეგ სამინისტროში განცხადება გააგზავნა
ამ ეტაპზე საუბრისგან თავს იკავებენ მსახიობებიც. მერაბ კაკალიამ და ირაკლი სამუშიამ „ლაივპრესთან“ საუბარზე უარი მოუცლელობის გამო თქვეს. ირაკლი სამუშია მხოლოდ მოკლე კომენტარით შემოიფარგლა და აღნიშნა, რომ მას თავად განცხადებისთვის ხელი არ მოუწერია.
თეატრში არსებულ დაპირისპირებაზე სოციალურ ქსელ ფეისბუკზე ვრცელი წერილი გამოაქვეყნა სამოქალაქო აქტივისტმა როსტომ ზარანდიამ, რომელსაც მანამდე თეატრის მხარდამჭერ არაერთ აქციაში მიუღია მონაწილეობა.
როსტომ ზარანდია ამბობს, რომ დროის დიდ ნაწილს თეატრში ატარებს და კარგად იცის, რაც ხდება. მან „ლაივპრესს“ უთხრა, რომ თეატრის ადმინისტრაცია ცდილობს ბადრი წერედიანს შეუქმნას ისეთი პირობები, რომ წასვლაზე განცხადება თავად დაწეროს. მიზეზი კი, მისი სიტყვებით, „შურია“, რადგან სამხატვრო ხელმძღვანელის ყველა ინიციატივა წარმატებული აღმოჩნდა. ამასთან, როსტომ ზარანდიას არგუმენტი, რომ ბადრი წერედიანი ცუდად მუშაობს, სასაცილოდ ეჩვენება. მით უფრო მაშინ, როცა სამხატვრო ხელმძღვანელის აქტიური მუშაობის შედეგად, დასი არაერთხელ მიიწვიეს გასტროლებზე ევროპის ქვეყნებში.
სამოქალაქო აქტივისტის ინფორმაციით, წერედიანის საწინააღმდეგო განცხადებას ხელი მსახიობებმა ადმინისტრაციის თხოვნით მოაწერეს ისე, რომ არც ეთანხმებიან მის შინაარს.
„თეატრი ბადრის მუშაობას უწუნებს, არადა ამ დროს თეატრს აქვს მოწვევა ბადრის მუშაობის შედეგად. თვითონ თეატრი ბლოკავს დასის გასტროლს. არ მუშაობსო ამბობენ და თვითონ ბლოკავენ. მე ყველა საბუთი მაქვს მოწვევაზე, ისე არაფერს ვამბობ. ყველა გასტროლი ჩაშალეს. განცხადებაზე ხელი მოაწერინეს 27 თანამშრომელს, როცა დასში არის 15. აქედან ორი ადგილზე არ არის. ანუ გამოდის ცამეტი. ამ ცამეტიდან ოთხმა არ მოაწერა ხელი. ანუ საბოლოოდ ცხრა ადამიანმა მოაწერა ხელი. რეალურად ტექნიკურ პერსონალს მოაწერინეს ხელი, არადა სამხატვრო ხელმძღვანელს ირჩევს დასი. უბრალოდ მოაწერეს ხელი. ძალდატანება არ ყოფილა, იმიტომ, რომ უბრალოდ ბოსმა უთხრა ასე“, - განაცხადა როსტომ ზარანდიამ.
მისი ინფორმაციით, ლიეტუაში მივლინებით მყოფი ბადრი წერედიანი მისი საწინააღმდეგო განცხადების შესახებ უკვე ინფორმირებულია და ჩამოსვლის შემდეგ გეგმავს სიტუაციაში გარკვევას.