ზუგდიდის თეატრის სამხატვრო ხელმძღვანელი ბადრი წერედიანი, რომელსაც მსახიობების და  ადმინისტრაციის ნაწილი დაუპირისპირდა, განათლების, მეცნიერების, კულტურისა და სპორტის სამინისტროში ახსნა-განმარტების მისაცემად მივიდა.

„მან მოიტანა საკმაოდ ვრცელი ახსნა-განმარტებითი ბარათი. ამჟამად სამინისტრო სწავლობს მის მიმართ წაყენებულ ბრალდებებზე პასუხს, რის შემდეგაც გამოვლინდება, თუ რა იქნება შემდეგი რეაგირება. შეიძლება მივლენილ იქნეს აუდიტის სამსახური ადგილზე. ეს ყველაფერი იქნება დაჩქარებულ პროცესში, რადგან ბადრი წერედიანი აქამდე არ იმყოფებოდა საქართველოში“, - გვითხრეს კულტურის სამინისტროში.

ზუგდიდის თეატრიდან სამინიტროში ორი წერილი გაიგზავნა. ერთი, სამხატვრო ხელმძღვანელის გათავისუფლების, მეორე კი მისი მხარდაჭერი.

ბადრი წერედიანის გათავისუფლების მომხრეები მას რეპერტუარის არქონაში, მაყურებლის დაკარგვასა და ახალი პროექტების ჩაშლაში ადანაშაულებენ.

სამხატვრო ხელმძღვანელის მხარდამჭერები კი ამბობენ, რომ მათ წარმატებული გასტროლები ჰქოდათ. რაც შეეხება რეპერტუარს, ბადრი წერედიანის თეატრში დარჩენის მომხრე მსახიობების თქმით, მათ შენობის არქონის გამო არასათანადო პირობებში უწევდათ მუშაობა.