შს მინისტრის რეგიონებში ჩასვლა არ არის პირველი. ის რამდენჯერმე იყო და ეს მნიშვნელოვანია იმისთვის, რომ ადგილზე ეცნობოდეს სამინისტროს წარმომადგენლების მუშაობას საარჩევნო პროცესის თვალსაზრისით, რათა პოლიციამ შეასრულოს თავისი მოვალეობა, - განუცხადა ჟურნალისტებს პარლამენტის იურიდიულ საკითხთა კომიტეტის თავმჯდომარე ეკა ბესელიამ. მისი სიტყვებით, გახარია არ ერევა არჩევნების პროცესში, მაგრამ ვალდებულია მოსახლეობის უსაფრთხოება, საზოგადოების წესრიგი დაიცვას. როგორც იურიდიულ საკითხთა კომიტეტის თავმჯდომარე ამბობს, გიორგი გახარიას ჩასვლა ზუგდიდში და ადგილობრივი ხელისუფლების წარმომადგენლებთან შეხვედრა, მეორე ტურის სტაბილურად ჩატარებას ემსახურება.

„ამ მხრივ, ძალიან დიდი მნიშვნელობა აქვს პოლიციის მზადყოფნას. განსაკუთრებით, როცა ჩვენ ვხედავთ, ბოლო წლებში, რამდენად დისტანცირებულია და იცავს პოლიცია პოლიტიკურ ნეიტრალიტეტს. ამ მხრივ, მინისტრის ადგილზე ჩასვლა და სტრუქტურების გაცნობა მხოლოდ ეხმარება ამ პროცესის კიდევ უფრო სტაბილურობას",- განაცხადა ბესელიამ. მისი ინფორმაციით, მმართველ გუნდს მეორე ტურისთვის ახალი სტრატეგია აქვს შემუშავებული, რომლის ფარგლებშიც უმრავლესობის წევრები აქტიურად გეგმავენ ხალხთან გასაუბრებას.

შინაგან საქმეთა მინისტრი 5 ნოემბერს იმყოფებოდა ზუგდიდში. გიორგი გახარიამ სამეგრელო-ზემო სვანეთის ადმინისტრაციის შენობაში გუბერნატორთან, მუნიციპალიტეტების მერებთან და მაჟრიტარ დეპუტატებთან შეხვედრა გამართა. მინისტრის სიტყვებით, ზუგდიდში მისი ვიზიტის მიზანი, არჩევნების პირველი ტურის შეფასება იყო. 5 ნოემბერსვე შეხვედრებისას გახდა ცნობილი, რომ ზუგდიდის საარჩევნო შტაბს გუბერნატორი ალექსანდრე მოწერელია უხელმძღვანელებს. ამ თანამდებობას მანამდე ყოფილი მერი ლაშა გოგია იკავებდა, რომელიც ქრთამის აღების ბრალდებით 1 ნოემბერს დააკავეს.