თი ბი სი ბანკის ზუგდიდის ფილიალის მმართველი გეგა შენგელია ადასტურებს ვიცე მერად საკუთარი კანდიდატურის განხილვას. მან „ლაივპრესს“ უთხრა, რომ მიმდინარეობს გარკვეული მოლაპარაკებები, თუმცა საბოლოო შეთანხმება ჯერ მიღწეული არ არის.

„ამ ეტაპზე შემიძლია გითხრათ ის, რომ ამ თემასთან დაკავშირებით რამდენიმე დღეში გაირკვევა ყველა დეტალი. ჯობია დაველოდოთ მოვლენების განვითარებას. არის გარკვეული მოლაპარაკებები. რამდენიმე დღეში ნათელი მოეფინება ყველაფერს“, - აღნიშნა მან.

გეგა შენგელია არ ადასტურებს 4 ნოემბერს, შს მინისტრთან გამართულ შეხვედრაზე ყოფნას.

თავის მხრივ, ზუგდიდის მერის მოვალეობის შემსრულებელმა მაიზერ ნანავმ გვითხრა, რომ ვიცე მერად რამდენიმე კანდიდატი განიხილება, თუმცა საბოლოოდ ვისზე შეაჩერებს არჩევანს, ჯერ თავადაც არ იცის.

ზუგდიდში გუშინდელ შეხვედრაზე გადაწყდა, რომ „ქართული ოცნების" საარჩევნო შტაბს ზუგდიდში სამეგრელო-ზემო სვანეთის გუბერნატორი, ალექსანდრე მოწერელია უხელმძღვანელებს.

ყოფილმა ვიცე-მერმა გია გულორდავამ თანამდებობა 13 სექტემბერს დატოვა.