არასამთავრობო ორგანიზაცია სამოქალაქო აქტივობისა და თანასწორობის ცენტრის ხელმძღვანელი ციცინო შენგელია ამბობს, რომ ზუგდიდის ახალი ბიუჯეტის პროექტში არ არის ასახული ქალთა საჭიროებები.

მან ბიუჯეტის ხარჯვის გამჭვირვალობაზე გამოცემა „ლიბერალის“ მიერ ორგანიზებულ შეხვედრაზე დასვა კითხვა, გაკეთდა თუ არა ახალი ბიუჯეტის პროექტის შედგენამდე ქალთა საჭიროებების კვლევა.

ზუგდიდის მერიის საფინანსო-საბიუჯეტო სამსახურის უფროსმა ნანი მიქენაიამ ჩამოთვალა რამდენიმე არგუმენტი, რომელიც მისი აზრით ნიშნავს, რომ ზუგდიდის 2019 წლის ბიუჯეტი გენდერულად მგრძნობიარეა.

„ახალ ბიუჯეტშიც გათვალისწინებულია ქალებზე ზრუნვა, დაწყებული მრავალშვილიანი ოჯახებიდან, სოციალურად დაუცველ ოჯახებზე პირველი შვილის შეძენისას 200 ლარიანი ფულადი დახმარება. გვაქვს ერთჯერადი დახმარებები, ყოველ ახალშობილ შვილზე დახმარებები იზრდება 100 ლარის ოდენობით. ტყუპი შვილის შეძენაზე 500 ლარის ოდენობით. დახმარებები გაიცემა მარტოხელა ქალებზე, მარჩენალდაკარგულ, ძალადობის მსხვერპლ ქალებზე. ასევე, 5 მილიონი ლარი გამოიყოფა სკოლამდელი აღზრდის დაწესებულებებისთვის. ბაღების გაძლიერება კი ნიშნავს, რომ ქალებს აქვთ მეტი დრო და საშუალება, შინამეურნეობით, ან სხვა საქმიანობით დაკავდნენ. მნიშვნელოვანია ასევე, ის რომ საბიუჯეტო ორგანიზაციებში დასაქმებულთა 70 % ქალია“, - განაცხადა ნანი მიქენაიამ.

ის ფაქტი, რომ დასაქმებულთა უმეტესობა ქალია, არ ნიშნავს, რომ ბიუჯეტი გენდერულად მგრძნობიარეა, - განაცხადა მერიის წარმომადგენლის კომენტარის პასუხად ციცინო შენგელიამ.

„გენდერულად მგრძნობიარე ბიუჯეტს აქვს სხვა პარამეტრები. ძალიან მნიშვნელოვანია კვლევების შედეგად გამოკვლეული ის საჭიროებები, რაც შემდეგში იქნება ასახული ბიუჯეტში. ქალები განიხილება როგორც მოწყვლადი ჯგუფი. საინტერესოა, რა კეთდება მათი ეკონომიკური გაძლიერებისათვის“, - აღნიშნა არასამთავრობოს წარმომადგენელმა.

შეხვედრაზე ისაუბრეს ასევე მუნიციპალიტეტის პროგრამაზე, რომელიც ძალადობის მსხვერპლ ქალებზე ერთჯერადად, 800 ლარით დაფინანსებას გულისხმობს.

შეხვედრის მონაწილე არასამთავრობო ორგანიზაციების წარმომადგენლების განცხადებით, უმჯობესი იქნება თუ მუნიციპალიტეტი უარს იტყვის ერთჯერადი დახმარების გაცემაზე და ძალადობის მსხვერპლი ქალებისთვის თავშესაფრის აშენებაზე იფიქრებს.