აფხაზეთის ავტონომიური რესპუბლიკის მთავრობამ საარჩევნო კოდექსი დაარღვია როცა დევნილებს სალომე ზურაბიშვილის მხარდაჭერისკენ მოუწოდა. „საერთაშორისო გამჭვირვალობა - საქართველო“ ამ ფაქტის გასაჩივრებას გეგმავს. ორგანიზაციის ზუგდიდის ოფისის კოორდინატორმა არჩილ თოდუამ „ლაივპრესს“ განუცხადა, რომ ამ შემთხვევაში მოხდა საკომუნიკაციო ადმინისტრაციული რესურსის საარჩევნო მიზნებისთვის გამოყენება.

„ეს წარმოადგენს კანონდარღვევას. „საერთაშორისო გამჭვირვალობა - საქართველო“ აპირებს, რომ ეს საკითხი გაასაჩივროს“, - გვითხრა არჩილ თოდუამ.

აფხაზეთის ავტონომიური რესპუბლიკის მთავრობამ დევნილებს სალომე ზურაბიშვილის მხარდაჭერისკენ დღეს მოუწოდა. მთავრობის მიერ „ლაივპრესისთვის“ გამოგზავნილ ოფიციალურ წერილში სახელწოდებით - „მიმართვა დევნილი თანამემამულეებისადმი“ ნათქვამია, რომ ახლა ქვეყანას სჭირდება ხელისუფლების მიერ მხარდაჭერილი პრეზიდენტობის კანდიდატის სალომე ზურაბიშვილისთვის ნდობის გამოცხადება.