საქველმოქმედო აქციას „გააზიარე სითბო“, ხობიც შეუერთდა. ქალაქის ცენტრში დღეს დაიდგა კარადა, სადაც მოსახლეობას საყოფაცხოვრებო ნივთები, ტანსაცმელი მოაქვს მათთვის, ვისაც ეს ყველაფერი სჭირდება. ქვეყნის მასშტაბით მიმდინარე კამპანიის შესახებ ხობის მკვიდრმა თამუნა სიჭინავამ სოციალური ქსელის საშუალებით შეიტყო. მეუღლესთან ერთად გადაწყვიტა, ინიციატივა მშობლიურ ქალაქში თავადაც განეხორციელებინა. ფეისბუკზე დააანონსეს გეგმების შესახებ, რასაც შესაბამისი გამოხმაურებაც მოჰყვა. ამბობს, რომ უკვე აქციაში მონაწილეობის სურვილი ძალიან ბევრმა ადამიანმა გამოთქვა. მათ შორის ხობის სოფლების მცხოვრებლებმაც. ტანსაცმელი, ფეხსაცმელი, ქურთუკები, თბილი პლედები ის ნივთებია, რომელიც მოქალაქეებმა უკვე მოიტანეს.

„მსურველი ძალიან ბევრია, ვინც მიკავშირდება და უნდათ რაღაცების მოტანა. ვისაც რისი სურვილი აქვს, შეუძლია ის მოიტანოს. მოვიდა ერთი მრავალშვილიანი გოგო, რომელმაც წაიღო ტანსაცმელი. დიდი აქტიურობაა. მე და ჩემს მეუღლეს ოთხი შვილი გვყავს და ძალიან კარგად ვიცით, რა სოციალური საჭიროებები არსებობს. სახელმწიფომ როგორი დახმარებაც არ უნდა გასწიოს, მაინც არ არის საკმარისი იმისთვის, რომ ყველა პირობა შეიქმნას“, - უთხრა თამუნა სიჭინავამ „ლაივპრესს“.

მისივე თქმით, კარადა ხობის მერიის „კულტურულ-საგანმანათლებლო ცენტრმა“ გადასცათ.

„ვისაც გაქვთ გაიღეთ“, „ვისაც არ გაქვთ აიღეთ“, „სიკეთე გადამდებია“, „ზამთარი ერთად გადავაგოროთ“, - ამ შინაარსის გზაბნილები გააკრეს აქციის მონაწილეებმა კარადაზე.

აქცია მანამ გაგრძელდება, ვიდრე მოქალაქის განმარტებით ამის საჭიროება იქნება.

კამპანიას „გააზიარე სითბო“, უახლოეს მომავალში ზუგდიდიც შეუერთდება.

„გააზიარე სითბო“, „ვისაც გაქვთ, გაიღეთ, ვისაც არა აიღეთ“, - ამ სახელწოდებით საქველმოქმედო აქცია დღეს უკვე მთელი ქვეყნის მასშტაბით გავრცელდა. მოქალაქეებმა სოციალური კარადები უკვე დადგეს ფოთში, თბილისში, ბათუმში, რუსთავსა და კასპში. აქციას მოქალაქეები შეუერთდნენ ზესტაფონში, საგურამოსა და საჩხერეშიც.