სესხების ჩამოწერის ვებ გვერდი Vali.ge ჩაირთო
ფონდ "ქართუში" განმარტავენ, რომ ვებ გვერდს ამოქმედებისთანავე ძალიან ბევრი მომხმარებელი ეწვია, რამაც მისი გადატვირთვა და გარკვეული ტექნიკური შეფერხება გამოიწვია. მათი მტკიცებით, აღნიშნული ხარვეზი ოპერატიულად აღმოიფხვრება და არავითარ გავლენას არ მოახდენს ვალების განულების პროცესზე.
"აქვე, დაინტერესებულ პირებისთვის განვმარტავთ, რომ მოქალაქეებს მომდევნო სამი კვირის განმავლობაში დაუბრკოლებლად შეეძლებათ აღნიშნული სერვისით სარგებლობა, ისინი უპრობლემოდ შეძლებენ საკუთარი მონაცემების გადამოწმებას და 15-დან 31 დეკებრამდე, 600 000-ზე მეტ ჩვენს თანამოქალაქეს ვალები სრულად გაუნულდება“, - ნათქვამია ფონდის განცხადებაში.
„ქართუსა“ და მთავრობის მიერ დაანონსებული სოციალური სოლიდარობის აქტით, ე.წ. „შავ სიაში“ მყოფ 600 000-ზე მეტ საქართველოს მოქალაქეს ვალები ჩამოეწერება. მთავრობამ ინიციატივა არჩევნების მეორე ტურამდე რამდენიმე დღით ადრე დააანონსა. მოქალაქეებს, რომელთა ვადაგადაცილებული სესხის ძირი თანხა არ აღემატება 2 000 ლარს, თანხა ჩამოეწერება.