ენმ: არ ვაპირებთ ლევან შონიაზე გავრცელებული ინფორმაციის უარყოფას
„კიდევ ერთხელ ხაზგასმით და ცალსახად ვამბობ, რა გადაწყვეტილებაც მოსამართლე ცაცუამ არ უნდა გამოიტანოს, არანაირი ინფორმაციის უარყოფას არ ვაპირებ. იგივეს ვიმეორებ დღესაც, რომ ყველა იმ დანაშაულებრივი ქმედებების, რაც იმ პერიოდში ხორციელდებოდა, პასუხისმგებელი და მონაწილე იყო ლევან შონია. მათ შორის კონტრაბანდაში. ამ საკითხთან დაკავშირებით ის არაერთხელ იყო დაბარებული დაკითხვაზე პროკურატურაში და სახელმწიფო უსაფრთხოების სამსახურში“, - განაცხადა ანა წითლიძემ.
მანვე დასძინა, რომ მოსამართლე მანუჩარ ცაცუას გადაწყვეტილება მისთვის მოულოდნელი არ ყოფილა, რადგან ის „პოლიტიკური დავალებების შესრულებით განსაკუთრებით გამოირჩევა“.
ზუგდიდის რაიონულმა სასამართლომ „ერთიანი ნაციონალური მოძრაობის“ წარმომადგენლებს ყოფილი გუბერნატორ ლევან შონიას შესახებ გავრცელებული ინფორმაციის უარყოფა დააკისრა. ანა წითლიძეს დაევალა მედიასაშუალებებში: „ლაივპრესში“, „ათინათსა“ და „რუსთავი2-ზე“ გავრცელებული ცნობის უარყოფა, სადაც ის ამბობდა, რომ სამეგრელო-ზემო სვანეთის ყოფილი გუბერნატორი აფხაზეთიდან დანარჩენ საქართველოში კონტრაბანდას მფარველობდა. ასევე ინფორმაციის უარყოფა დაეკისრა ენმ-ის ერთ-ერთ ლიდერ მურთაზ ზოდელავას. საუბარია მის მიერ „რუსთავი2-ით“ გავრცელებულ ინფორმაციაზე, სადაც ის საუბრობს, რომ ლევან შონია „კავშირშია კონტრაბანდისტ ოკუპანტებთან და სეპარატისტებთან“.
ზუგდიდის სასამართლომ ნოემბერში დაწიყო სამეგრელო-ზემო სვანეთის ყოფილი გუბერნატორის სარჩელის განხილვა. ლევან შონია „ერთიანი ნაციონალური მოძრაობის“ სამეგრელოს რეგიონული ორგანიზაციის თავმჯდომარე მურთაზ ზოდელავას და ზუგდიდის საკრებულოს ფრაქცია „ნაციონალური მოძრაობის" თავმჯდომარე ანა წითლიძეს ცილისწამებაში ადანაშაულებდა.
ლევან შონიამ ოპოზიციური პარტიის ხელმძღვანელი პირების წინააღმდეგ სამოქალაქო სარჩელი ჯერ კიდევ გუბერნატორის თანამდებობაზე ყოფნისას, მიმდინარე წლის ივნისში შეიტანა. გუბერნატორის ადმინისტრაციამ სარჩელთან დაკავშირებით ივნისში განაცხადა, რომ საქმე ეხება სხვადასხვა მედიასაშუალებით ოპოზიციური პარტიიის წარმომადგენლების მხრიდან გაკეთებულ განცხადებებს, „რომლებსაც საზოგადოება შეჰყავს შეცდომაში და არ არის გამყარებული ფაქტებით“.