ზუგდიდის მერობა მალხაზ ქუჩულორიას სურს. უკვე შექმნილია საინიციატივო ჯგუფიც, სტუდენტ-ახალგაზრდობით, პედაგოგებით, სხვადასხვა სფეროს წარმომადგენლებით დაკომპლექტებული, რომლებმაც მხარდამჭერი ფეისბუკ გვერდიც შექმნეს. ჯგუფში 400 ადამიანამდეა გაერთიანებული, თუმცა ამბობენ, რომ დაკომპლექტების პროცესი გრძელდება. მათი ვინაობა მოგვიანებით გახდება ცნობილი. მალხაზ ქუჩულორიას თქმით, მსგავსი შემოთავაზება ადრეც ჰქონდა დეპუტატობაზე. მიიღებს თუ არა გაზაფხულზე დაგეგმილ მერის რიგგარეშე არჩევნებში მონაწილეობას, ამ ეტაპზე ერთმნიშვნელოვანი პასუხი არ აქვს, თუმცა განმარტავს, რომ ეს დიდწილად საზოგადოების რეაქციაზე იქნება დამოკიდებული.

„მაგრამ პრეტენზია მაქვს. არცერთი პოლიტიკური პარტიისგან შემოთავაზება ჯერ არ მიმიღია. „ქართული ოცნებისგან“ თუ იქნება შემოვაზება, აუცილებლად მივიღებ და უპირობოდ მივიღებ იქიდან გამომდინარე, რომ ვარ მმართველი პარტიის მხარდამჭერი“, - განაცხადა „ლაივპრესთან“ საუბარში მალხაზ ქუჩულორიამ.

განათლებით იურისტია. მისი თქმით, ადრე, ცოტა ხნის განმავლობაში სახელმწიფო სტრუქტურებში უმუშავია. 90-იან წლებში რუსეთში მოუწია წასვლამ, სადაც ბიზნესით იყო დაკავებული. ამის შემდეგ კი ბიზნეს საქმიანობა ბათუმსა და თბილისში განაგრძო. იყო ერთ-ერთი სამშენებლო ქართული კომპანიის დირექტორიც. ამბობს, რომ დღეს არაფერს საქმიანობს. 

მალხაზ ქუჩულორიას სურს ზუგდიდი კონკრეტული სპეციფიკით გამორჩეული ადგილი გახდეს მსოფლიოში. ამბობს, რომ ეს შესაძლებელია, როგორ ხმამაღალ ნათქვამადაც არ უნდა მოეჩვენოს ეს ვინმეს. ისეთი სივრცე უნდა შექმნან, რაც ტურისტებს დააინტერესებთ და საგანგებოდ მის სანახავად ჩამოვლენ. აქვს საინიციატივო ჯგუფის წევრებთან ერთად ხედვაც, რის ქალაქად უნდა იქცეს ზუგდიდი, თუმცა ამ ყველაფერზე მოგვიანებით ისაუბრებენ.

„მსგავსი არ უნდა არსებობდეს არსად. მე ვამბობ, როგორც პატარა ქალაქზე და არა მეგაპოლისზე. ჩვენ გვაქვს კონკრეტული ხედვა, რისი ქალაქი უნდა გახდეს, რომლიც ძალიან ძვირი არ ჯდება და საინტერესო იქნება. უხეშ მაგალითს მოგიყვანთ. თეორიულად ვამბობ, რომ იყოს ზუგდიდი შადრევნების ქალაქი, სადაც იქნება 50 შადრევანი. ეს არარეალურია. შადრევანი ძალიან ძვირი ჯდება, მაგრამ მინიშნებას გაძლევთ. ზუგდიდი რაღაცის ქალაქი უნდა გახდეს“, - გვითხრა მალხაზ ქუჩულორიამ.

ის მოსახლეობისთვის საინტერესო, ახალი თემების შეთავაზებას გეგმავს. მანამდე ამბობს, რომ სურთ პირველ რიგში საზოგადოების აზროვნება, დამოკიდებულება შეცვალონ საქმის კეთებისადმი. თუმცა განმარტავს - ყველაფერი განათლებით და მოქალაქეთა უნარ-ჩვევების განვითარებაზე ზრუნვით უნდა დაიწყონ, თხილის სექტორი იქნება ეს, თუ სხვა მიმართულება.

თავად საინიციატივო ჯგუფის წევრების განცხადებაში აღნიშნულია, რომ მალხაზ ქუჩულორიას აქვს კონკრეტული ხედვები და გეგმები ზუგდიდის განვითარების, ახალი სამუშაო ადგილების შექმნის და ხალხის დასაქმების კუთხით, რომ მას შეუძლია მუნიციპალიტეტის განვითარებაში ახალი ენერგეტიკის შემოტანა. ამასთან, განმარტავენ, მათ სასურველ კანდიდატს მიაჩნია - ერთხელ და სამუდამოდ უნდა დასრულდეს სამოქალაქო დაპირისპირება და მაქსიმალურად უნდა იყოს უზრუნველყოფილი მოსახლეობის ფართო მასების ჩართულობა მნიშვნელოვანი გადაწყვეტილებების მიღების პროცესში.

ზუგდიდის მერის თანამდებობა ვაკანტური მას შემდეგ გახდა, რაც ყოფილმა ვიცე-მერმა გია გულორდავამ ეს პოსტი 13 სექტემბერს დატოვა. მანამდე, საკუთარი განცხადების საფუძველზე გადადგა ყოფილი მერი ლაშა გოგია. ორივე მათგანს ბრალად ედებათ ქრთამის აღება, ქალაქში მდებარე გულუას ბაღის და რკინიგზის სადგურის მიმდებარე ტერიტორიების იჯარით გასაცემ აუქციონზე გატანის სანაცვლოდ.