დე ფაქტო ომბუდსმენი: კარანტინისას ხელისუფლებას გალელების საჭიროებები უნდა გაეთვალისწინებინა
ასიდა შაკრილი ამბობს, რომ „საზღვრის“ ჩაკეტვა პირველად არ მომხდარა, და რომ მსგავსი გადაწყვეტილებები ყოველთვის ხდებოდა მოქალაქეთა უკმაყოფილების მიზეზი, რადგან ენგურის ხიდზე შეუფერხებელი მიმოსვლა აუცილებელია მოსახლეობის დიდი ნაწილისთვის, განსაკუთრებით მათთვის, ვინც საქართველოში მკურნალობის მიზნით გადადის. ასევე ხანდაზმულებისთვის, რომლებიც აქ პენსიას, ან სხვა სახის დახმარებას იღებენ. თუმცა, დე ფაქტო სახალხო დამცველის თქმით, აფხაზეთის ხელისუფლება დღეს პირველად აღმოჩნდა ადგილობრივთა მხრიდან მსგავსი მწვავე რეაქციის წინაშე.
ომბუდსემნი ამბობს, რომ კარანტინის გამოცხადება აუცილებელი ღონისძიება იყო. მაგალითად სწორ მიდგომად მიაჩნია მკურნალობის საჭიროების მქონე პირებისთვის საზღვრის გახსნის გადაწყვეტილება. თუმცა ამ პროცესში ასიდა შაკრილმა მეტი დაფიქრების საჭიროება დაინახა, უბრალო ადამიანებზე გადაადგილების შეზღუდვით ნეგატიური ზეგავლენის შესამცირებლად. მისი თქმით, საჭირო იყო მეტი დასაბუთება და ანალიზი, კარანტინის ამდენი ხნით გამოცხადების საპასუხოდ. ეს, მისი აზრით, შეასუსტებდა მოქალაქეთა წუხილს.
„ძნელია გაიგოთ ასეთი ქმედებების მიზანშეწონილობა, მაგალითად, როგორც საქართველოს უნივერსიტეტის სტუდენტებისთვის საზღვრის გადაკვეთის აკრძალვაა, რომლებიც მშობლებთან აფხაზეთში საახალწლო არდადეგებისთვის ჩამოვიდნენ. ადგილობრივ ადმინისტრაციას უნდა ჰქონოდა მონაცემები, თუ რა სერიოზული პრობლემების წინაშე აღმოჩნდებოდა ხალხი კარანტინის შემოღებით. შესაძლოა, ასეთ ვითარებაში აზრი ქონოდა საერთაშორისო ორგანიზაციების დახმარების თხოვნით მიმართვას“, - განაცხადა ასიდა შაკრილმა.
დე ფაქტო ომბუდსმენის თქმით, ვითარება კიდევ ერთმა გარემოებამ გაამწვავა, რომ ამ დრომდე გალელების სამართლებრივი სტატუსი და დოკუმენტების საკითხი ბოლომდე არ არის გარკვეული. მანვე აღნიშნა, რომ პრობლემა არის შედეგი აფხაზეთის ხელისუფლების მხრიდან გალელების მიმართ პოლიტიზებული, მოკლევადიანი გადაწყვეტილებების. ის გამოსავალს საკითხების გრძელვადიან და სამართლიან გადაჭრაში ხედავს.
გალელებს, რომლებმაც საპროტესტო გამოსვლის მიუხედავად რაიონის დე ფაქტო ადმინისტრაციისგან სასურველი პასუხი ვერ მიიღეს, ახლა მხოლოდ გალის ე.წ. დეპუტატის იმედი აქვთ.
ენგურის ხიდზე მეთოთხმეტე დღეა გადაადგილება შეზღუდულია ორი თვით.
თავის მხრივ, დე ფაქტო ხელისუფლებას მიმართავს თბილისი და მოუწოდებს გადახედოს გადაწყვეტილებას.
ინფორმაციას „აფსნიპრესი“ ავრცელებს.