ხობის მუნიციპალიტეტის სოფელ პირველ მაისში, ბუსკანძეების სახლის მეორე სართული სრულად დაიწვა. ასევე, განადგურებულია სარეალიზაციოდ გამზადებული რამდენიმე ტონა დაფნა. როგორც ადგილობრივმა მცხოვრებმა „ლაივპრესს“ შეატყობინა, ხანძრის შედეგად არავინ დაშავებულა, რადგან ცეხცხლი საღამოს, დაახლოებით 17:00 საათისთვის გაჩნდა. ადგილზე მობილიზებული იყო სახანძრო სამაშველო სამსახური, თუმცა სახლის მეორე სართულის გადარჩენა ვერ მოხერხდა, რადგან ხის კონსტრუქციას ცეცხლი სწრაფად მოედო. დაზიანებულია შენობის პირველი სართულიც.

როგორც „ლაივპრესს“ სოფელ პირველ მაისში მერის წარმომადგენელმა, მარინე ლაგვილავამ განუცხადა, პირველ ეტაპზე ეცდებიან ოჯახს პირველი სართული გადაუხურონ, რათა მათ ღია ცის ქვეშ არ მოუწიოთ ყოფნა. მარინე ლაგვილავას თქმით, დეტალურად, თუ რა სახის დახმარება გაეწევა ბუსკანძეების ოჯახს, ორშაბათს მერთან შეხვედრის შემდეგ გაირკვევა. თავდაპირველი მონაცემებით, ხანძარი ელექტროსადენებიდან გაჩნდა. 

ფოტოები "ლაივპრესს" სოფლის მცხოვრებმა მიაწოდა.