2019 წელს გამოსაშვები გამოცდები მე-11 კლასის მოსწავლეებისთვის, 2020 წელს კი მე-12 კლასშიც გაუქმდება. ამის შესახებ შეფასებისა და გამოცდების ეროვნული ცენტრის დირექტორმა სოფო გორგოძემ განათლების რეფორმის ფარგლებში საქართველოს განათლების, მეცნიერების, კულტურისა და სპორტის მინისტრ მიხეილ ბატიაშვილთან ერთად გამართულ პრეზენტაციაზე განაცხადა.

მისი განმარტებით, სკოლა ატესტატს გასცემს აკადემიური მოსწრების საფუძველზე. რაც შეეხება ერთიან ეროვნულ გამოცდებს, გორგოძის თქმით, 2020 წელს ქართული ენისა და ლიტერატურისა და უცხო ენის გამოცდები სავალდებულო იქნება ყველასთვის. სავალდებულო აღარ იქნება ზოგადი უნარების გამოცდა.

მესამე სავალდებულო საგანი განისაზღვრება უმაღლესი სასწავლებლის პროგრამების მიხედვით. უნივერსიტეტებს კი უფლება ექნებათ სურვილის შემთხვევაში დაამატონ თავისი პროგრამის არჩევითი გამოცდა, მათ შორის ზოგადი უნარები.