ენგურის ხიდზე მოქალაქეების მოლოდინის მიუხედავად, რომ კარანტინი მოიხსნებოდა,  გადაადგილება კვლავ შეზღუდულია. დე ფაქტო მთავრობის მიერ გამოცხადებული კარანტინი ამ დრომდე მოქმედებს. თუმცა მიუხედავად ამისა, აფხაზეთიდან დანარჩენ საქართველოში გალელების ნაწილი მაინც ახერხებს გადმოსვლას. როგორც „ლაივპრესს” გალელმა რესპონდენტმა უთხრა, ე.წ მესაზღვრეებმა 40 ლარის სანაცვლოდ გამოატარეს. რესპონდენტი განმარტავს, რომ ნათესავის პანაშვიდზე გადმოვიდა ზუგდიდში და სანაცვლოდ იძულებილი იყო გარკვეული თანხა გადაეხადა.

ენგურის ხიდზე ე.წ. ღორის გრიპის თავიდან აცილების მიზნით ორთვიანი კარანტინი 11 იანვარს გამოაცხადეს. გალელები იმედოვნებდნენ, რომ დე ფაქტო მთავრობა შეზღუდვას გაცილებით ადრე მოხსნიდა, თუმცა ეს მოლოდინი არ გამართლდა. გამონაკლისი დაშვებულია მხოლოდ ავადმყოფებზე და ენგურჰესის თანამშრომლებზე. ახლა უკვე რესპონდენტები ამბობენ, რომ შესაძლოა ადმინისტრაციული საზღვარი მარტამდე არ გახსნან.