ევროკომისია: საქართველო-ევროკავშირის ურთიერთობებში ანაკლიის პორტის პროექტი პრიორიტეტულია
როგორც „ლაივპრესს“ „ანაკლიის განვითარების კონსორციუმიდან“ აცნობეს, შეხვედრაზე ჰენრიკ ჰოლოლეიმ ანაკლიის პორტის პროექტის სტრატეგიულ მნიშვნელობაზე ისაუბრა, პროექტისადმი სრული მხარდაჭერა გამოხატა და განაცხადა რომ „საქართველო–ევროკავშირის ურთიერთობებში ანაკლიის ღრმაწყლოვანი პორტის მშენებლობა ერთ–ერთი პრიორიტეტული პროექტია".
„ძალიან კარგი შეხვედრა გვქონდა „ანაკლიის განვითარების კონსორციუმთან“. საქართველოს სჭირდება ღრმაწყლოვანი პორტი შავ ზღვაში. სადღეისოდ საქართველოს პორტებს არ შეუძლიათ გემების 75%–ის მიღება იმიტომ, რომ ქვეყანაში არ არსებობს ღრმაწყლოვანი პორტი. ანაკლია არამარტო პორტი იქნება, არამედ ეს იქნება სავაჭრო-ლოგისტიკური ცენტრი, ეს იქნება ეკოსისტემა. ეს არის ძალიან ამბიციური პროექტი და მონდომებული ვართ, რომ ამ პროექტმა საბოლოო სახე მიიღოს. ეს არის ერთ–ერთი იმ პროექტებს შორის, რომელიც არის ევროკავშირ–საქართველოს შორის პრიორიტეტული და რა თქმა უნდა ჩვენ მოხარული ვიქნებით, ვნახოთ, რომ ეს პროექტი მიიწევს წინ"- განაცხადა ჰენრიკ ჰოლოლეიმ.
ვიზიტის ფარგლებში, დაგეგმილია მისი შეხვედრები საქართველოს ეკონომიკისა და მდგრადი განვითარების მინისტრ გიორგი ქობულიასა და ქვეყნის აღმასრულებელი ხელისუფლების სხვა ხელმძღვანელ პირებთან, აგრეთვე სატრანსპორტო კომპანიების წარმომადგენლებთან.