ზვიად სიჭინავა ზუგდიდის მერის რიგგარეშე არჩევნებში მონაწილეობას ხელმეორედ გეგმავს. მხოლოდ არა როგორც დამოუკიდებელი კანდიდატი. ამბობს, რომ ჯერ საზოგადოება და ქვეყანა ამისთვის მზად არ არის. რატომ გადაწყვიტა ორი წლის წინ განცდილი მარცხის შემდეგ იგივე პოზიციაზე კენჭისყრა, განმარტავს - ბრძოლა ყოველთვის ღირს. მისი თქმით, ხშირად მშობლიურ ქალაქზე უსიამოვნო ამბები ესმის, კორუფცია იქნება ეს, მერის დაჭერა, დანგრეული სტადიონი თუ ფაროსანა. ამიტომაც სურს ზუგდიდი არ მოიაზრებოდეს როგორც პოლიტიკური ველი, არამედ ეს იყოს მენეჯერების, ბიზნესმენების, წინსვლის ადგილი. განვითარების პროცესში კი მონაწილეობა თავადაც სურს. სწორედ ამან გადააწყვეტინა მერად ხელახლა კენჭისყრაც.

ზვიად სიჭინავა „ლაივპრესთან“ საუბარში ამბობს, რომ საჭიროა ქალაქების, ქვეყნების გამოცდილების ეფექტურად გამოყენება:

„არ ვამბობს, რომ უეჭველი მე მინდა მერი ვიყო. მზად ვარ, თუ კარგი კანდიდატები იქნებიან ხელისუფლების მხრიდან, ან ოპოზიციისგან, ნებისმიერს დავუჭირო მხარი, თუ ვნახავ, რომ ისინი მზად არიან განავითარონ ქალაქი, მოიზიდონ ბიზნესმენები, ინვესტიციები. რაც აკლია ჩემს ქალაქს, ეს არის ნორმალური მენეჯმენტი და ლოჯისტიკა. ფიზიკურადაც დავეხმარები და შეიძლება ფინანსურადაც გვერდში დავუდგე“.

მიიღებს თუ არა მმართველი პარტიის შეთავაზებას, ამბობს, რომ „დიდი სიამოვნებით“. ითანამშრონმლებს ოპოზიციასთანაც, სხვადასხვა ბლოკთან თუ ჯგუფთან, ვისაც ზუგდიდისთვის სასიკეთო ცვლილებები სურს.

რა მოლოდინი აქვს, დაუჭერს თუ არა მოსახლეობა მხარს, განმარტა - ადამიანებთან მისვლაა საჭირო, მათთვის ინფორმაციის მიწოდება, რისი გაკეთება შეუძლია და როგორ. ზვიად სიჭინავას თქმით, მისი დევიზი ყოველთვის იყო - თვითმმართველობა ხალხს.

„მოსახლეობამ უნდა გადაწყვიტოს თავისი ხვალინდელი დღე. რა მჭირდება დღეს მე სახლში, ვიცი მე. არ იცის ჩემმა მეზობელმა“, - გვითხრა ზვიად სიჭინავამ.

რამ შეუშალა ხელი ორი წლის წინ გამარჯვებაში, აღნიშნავს, რომ ალბათ პირველ რიგში გამოუცდელობამ. მისი თქმით, შეიძლება იყოს ცუდი პოლიტიკოსი, თუმცა კარგი მენეჯერია, რაც არაერთხელ დაამტკიცა:

„ალბათ იმ პერიოდში არ სჯეროდა ჩემი ზუგდიდელების უმრავლესობას. თუმცა მე მათი მადლობელი ვარ მხარდაჭერისთვის“.

აქვს სლოგანი - ზუგდიდი ნომერ პირველი ქალაქი გახდეს საქართველოში, რისი პოტენციალიც ამბობს, რომ მუნიციპალიტეტს ნამდვილად აქვს.

ზვიად სიჭინავა 2017 წლის მერის არჩევნებში მონაწილეობდა, თუმცა დამარცხდა. ის ამ თანამდებობისთვის, როგორც დამოუკიდებელი კანდიდატი, ისე იბრძოდა.