ზუგდიდის განახლებულ ბოტანიკურ ბაღში შესვლა სავარაუდოდ 3 ლარი ეღირება
„2022 წელს ჩვენ ვიქნებით ფინანსურად დამოუკიდებლები, თუ სწორად ჩავდეთ ინვესტიციები“ , - განუცხადა ზუგდიდის საკრებულოს წევრებს საკომისიო მოსმენაზე ააიპ „ბოტანიკური ბაღების მართვის ცენტრის“ დირექტორმა ზვიად ქარჩავამ.
მისი ინფორმაციით, ამ ეტაპზე ბოტანიკური ბაღის ააიპის ბიუჯეტი 300 ათასი ლარია, თუმცა მას შემდეგ, რაც დასრულდება სამუშაოები, მისი მოვლა-პატრონობისთვის საჭირო იქნება დამატებით 350 ათასი ლარი. ზვიად ქარჩავას მტკიცებით, ბაღში სარეკონსტრუქციო სამუშაოები მაისში დასრულდება.
მეცხრამეტე საუკუნეში გაშენებული და მოუვლელობის გამო განადგურებული ზუგდიდის ბოტანიკური ბაღის რეკონსტრუქცია მრავალწლიანი დაპირებების შემდეგ გასული წლის თებერვალში დაიწყო. ბაღის აღდგენის სამუშაოებს საქართველოს მუნიციპალური განვითარების ფონდი ახორციელებს.
პროექტს მსოფლიო ბანკი ადგილობრივი ბიუჯეტის თანამონაწილეობით აფინანსებს. მისი საერთო ღირებულება 12 მილიონი ლარია.