ბაჩანა შენგელია საკომიტეტო მოსმენაზე: იას მოუწყვეს მორალური სასამართლო
მან დედის გარდაცვალებასა და ზუგდიდის მე-6 სკოლის შემოწმების საქმეზე გამოძიება მოითხოვა, საუბრის ბოლოს კი აღნიშნა, ჯერ კიდევ იტოვებს იმედს, რომ პროკურატურა საქმით დაინტერესდება.
ბაჩანა შენგელიას სიტყვებით, მინდობილობით ითხოვა, სკოლის შემოწმების საქმის წარმოებაში პირადად ჩართულიყო, რადგან დედა ძალიან განიცდიდა შექმნილ ვითარებას, თუმცა ამის საშუალება არ მიეცა. ბაჩანა შენგელიამ შეხვედრაზე კიდევ ერთხელ აღნიშნა, რომ წერილი, რომლის საფუძველზეც დაწიყო თითქოს დარღვევების შესწავლა, დაწერა ვინმე ლავრენტი ქირიამ, რომელიც ბუნებაში არ არსებობს.
მისი სიტყვებით, წერილი არის შეთითხნილი და შეტანილი განათლების სამინისტროში, ვის მიერ, კაცმა არ იცის. თქვა, რომ ამ კითხვასაც სწორედ გამოძიებამ უნდა გასცეს პასუხი, რომელიც ორი თვეა, არ იწყება.
„მინდა, მორალურ ნაწილსაც შევეხო. ყველა ამ ქმედებაზე ბატონმა მინისტრმა აიღო პასუხისმგებლობა. დღემდე, ამ სხდომამდე, მქონდა იმედი, რომ ის ან შეცდომას დაარქმევდა ამას, იტყოდა, რომ შეიძლება მან რაღაც კანონები დაარღვია ან მისმა მოხელეებმა, შეიძლება ის ამას გამოიკვლევდა, მაგრამ მან პირადად აიღო ყველაფერზე პასუხისმგებლობა. შესაბამისად, ჩემთვის ეს არის ძალიან მნიშვნელოვანი გზავნილი. ანუ, მთელს ამ პროცესზე ამბობს, რომ არის სამართლებრივი პროცესი. სინამდვილეში, მიმაჩნია, რომ იას მოუწყვეს მორალური სასამართლო. ის შემოწმების აქტი მისთვის ზუსტადაც რომ იყო მორალური სასჯელი, რომელიც ვერ გადაიტანა“, – განაცხადა ბაჩანა შენგელიამ.
ზუგდიდის მე-6 საჯარო სკოლის დირექტორი ია კერზაია ინსულტით 2018 წლის დეკემბერში გარდაიცვალა. ამას წინ უძღოდა დარღვევების არსებობის შესახებ მოქალაქის წერილის საფუძველზე სკოლაში შემოწმების დაწყება. თავად ია კერზაია გარდაცვალებამდე მედიასთან პოლიტიკური ნიშნით ზეწოლაზე საუბრობდა, „რადგან არჩევნებზე არ იმუშავა მმართველი პარტიის მხარდაჭერილი კანდიდატის სასარგებლოდ“. განათლების სამინისტროს განცხადებით, დეპუტატების ნაწილი მომხდარს პოლიტიკური ზრახვებისთვის იყენებს. მთავარი პროკურატურის თქმით, სკოლაში ინსპექტირების შედეგად ამ ეტაპზე დანაშაულის ნიშნები არ იკვეთება.