ანაკლიის ბულვარში პალმების ნაწილი სოკოთი დაავადდა
დასკვნის თანახმად, ცენტრის თანამრომლებმა 25-28 იანვარს ფიტოსანიტარული მონიტორინგი განახორციელეს ანაკლიის ბულვარსა და განმუხურის სანაპიროზე გაშენებულ მწვანე ნარგავებზე. მათ შორის პალმებზე (ვაშინგტონია), ფიჭვებზე, ფოთლოვან და ბუჩქოვან მცენარეებზე და დაზიანებული ნიმუშები აიღეს. შედეგად, გაირკვა რომ პალმის ფოთლებზე დაფიქსირდა სოკოვანი დაავადებები, ხის ტანზე კი მავნე ორგანიზმები არ გამოვლენილა.
სოკო აღმოჩნდა ფიჭვების ნაწილზეც. ხმობაშეპარულ მცენარეში ნახეს სხვადასხვა მავნებელი. მათ შორის ქერქიჭამიები, ხარაბუზები, ტკიპები. ასევე, ცაცხვებსა თუ ბუჩქოვან მცენარეებზე მავნებელი მღიერები, რომელიც საფრთხისშემცველია ხის ნორმალური ზრდა-განვითარებისთვის.
მცენარეთა ბიოლოგიური დაცვის ცენტრმა რეკომენდაციებიც შეიმუშავა. მათი თქმით, საჭიროა მცენარეთა გაჯანსაღების მიზნით ჩატარდეს სანიტარულ-ჰიგიენური ღონისძიებები. კერძოდ, მცენარეებიდან გამხმარი ტოტები უნდა მოიჭრას და განადგურდეს, როგორც ინფექციის წყარო.
ამასთან, მავნე ორგანიზმების წინააღმდეგ პირველი წამლობა უნდა ჩატარდეს აპრილის ბოლოს, მეორე კი ივნისში. დასკვნის თანახმად, მიზანშეწონილია მცენარეთა როგორც ფოთლოვანი, ისე ფესვის გამოკვლევა.
მონიტორინგის შედეგად დადგინდა ისიც, რომ ანაკლიის ბულვარის ტერიტორიაზე არსებული სტადიონის მწვანე საფარიც საგანგებოდ უნდა დამუშავდეს.
შპს „ანაკლია-განმუხური-რესორტის“ დირექტორმა ბესიკ თოდუამ „ლაივპრესს“ უთხრა, რომ რეკომენდაციებს გაითვალისწინებენ და რჩევების მიხედვით იმოქმედებენ.
ანაკლიის ბულვარში პალმების ნაწილი რომ დაავადდა, ამის შესახებ შპს-ს დირექტორის მოადგილე კობა ქარჩავამ ააიპ-ების საქმიანობის შემსწავლელი კომისიის სხდომაზე განაცხადა.