სვანეთში ოქროს მოპოვების დაუყოვნებლივ შეჩერებას ითხოვენ
როგორც შეკრებილებმა განაცხადეს, გარემოს დაცვისა და ბუნებრივი რესურსების სამინისტრომ ჯერ კიდევ 2006 წელს კომპანია „ოპტიკალ სისტემს ინკს“ მესტიის მუნიციპალიტეტში ოქროს მოპოვებისა და წარმოების საშუალება მისცა. მათი ინფორმაციით, სვანეთის მუნიციპალიტეტის უდიდესი ნაწილი - 39 000 ჰექტარი, დასახლებული ადგილები, მრავალსაუკუნოვანი კოშკები, ეკლესიები, სასაფლაოები, სახლები ლიცენზიის მოქმედების არეალში მოექცა და კომპანიას შეუძლია მოძიებითი და მოპოვებითი სამუშაოები აწარმოოოს.
შეკრებილთა განცხადებით, ამ ეტაპზე გარემოს დაცვის სამინისტროში საწარმოს მშენებლობის შესახებ ლიცენზიის გაცემის საკითხი განიხილება. სვანეთის საზოგადოება დარწმუნებულია, რომ ოქროს საწარმოო პროცესის დაწყება უდიდეს ზიანს მიაყენებს სვანეთის ეკოლოგიას და ბუნებას გაანადგურებს. მათი კიდევ ერთი მოთხოვნაა, სვანეთში განსახორციელებელ მასშტაბურ პროექტებთან დაკავშიორებით ხელისუფლებამ საჯარო ღია კონსულტაცია წინასწარ გამართოს.
როგორც სვანეთის მცხოვრებლები აცხადებენ, მათ ხატზე დაიფიცეს, რომ კომპანიას ოქროს მოძიებითი და მოპოვებითი სამუშაოების საშუალებას არ მისცემენ. მათი თქმით, სვანებისთვის ღვთისა და ხალხის წინაშე ფიცის დარღვევა დაუშვებელია, ხოლო მისი აღსრულება სავალდებულოა.