მწერლებმა დათო გორგილაძემ და დიანა ანფიმიადიმ ზუგდიდელ ბავშვებს ტექნოპარკში თანამედროვე ქართული ზღაპრების კრებული „იყო ერთი გოგო“ და ალექსანდრე ლორთქიფანიძის წიგნი „იავნანა ლილისთვის“ წაუკითხეს.

„იყო ერთი გოგო“ 12 პოპულარული ქართველი ავტორის 21 ზღაპარს აერთიანებს. ეს არის ამბები ქალებზე, რომლებმაც საქართველოს ისტორიასა თუ საზოგადოებრივ ცხოვრებაში საკუთარი მნიშვნელოვანი კვალი დატოვეს. ნაწარმოებების პერსონაჟები არიან როგორც ყველასთვის ნაცნობი, ისე ნაკლებად ცნობილი ქალები: კოლხი მედეა, თამარ მეფე, პირველი ქართველი მფრინავი ქალი რუსუდან ჟორდანია, მარო მაყაშვილი, პოეტი ქალი ხვარამზე და სხვები.

წიგნში დიანა ანფიმიადის ორი ზღაპარია შესული, მათ შორის ერთ-ერთი „ვეფხისტყაოსნის“ გადამწერ ქალზე.

„ყველა ის პერსონაჟი,რომელიც არის წარმოდგენელი ამ წიგნში არის რეალური, მაგარი გოგოების ამბებია. ერთ-ერთი ჩემი ზღაპარი არის მანანაზე, რომელიც არის „ვეფხისტყაოსნის“ გადამწერი, ის მე-17 საუკუნის პოეტი ქალია, რომელსაც სამწუხაროდ ლიტერატურული მეხსიერება ვეღარ იხსენებს, ამიტომ მგონია, რომ მნიშვნელოვანია მისი გახსენება და გარდა ამისა, აღმოჩნდა რომ ის კარგი სასკოლო რესურსია, მას ძალიან კარგად იყენებენ ქართული ენისა და ლიტერატურის მასწავლებლები“, - ამბობს მწერალი.

ზუგდიდელ ბავშვებს მწერალმა დათო გორგილაძემ „იავნანა ლილისთვის“ წაუკითხა, რომელიც .კამპანია „კაცები ზრუნავენ“ - ის ფარგლებში ალექსანდრე ლორთქიფანიძემ დაწერა.

წიგნი ერთი ჩვეულებრივი ოჯახის ცხოვრებაზე მოგვითხრობს, სადაც დედა და მამა თანაბრად ინაწილებენ შვილების აღზრდის პასუხისმგებლობასა და საოჯახო საქმეებს, სადაც უახლოესი ადამიანები ერთმანეთზე ყოველდღიურად ზრუნავენ და სადაც ჰარმონია ურთიერთგაგებით, საერთო გამოწვევებისა და პრობლემების გააზრებითა და მათი გადაჭრის გზების ერთობლივად ძიებით მიიღწევა.

შეხვედრის დასასრულს, პატარებს წიგნები დაურიგეს და ზღაპრების ილუსტრაციით გაფორმებული ტორტიც დაუჭრეს.

ზღაპრები გაეროს მოსახლეობის ფონდის (UNFPA) საქართველოს ოფისისა და გაეროს ქალთა ორგანიზაციის (UN Women) ინიციატივით დაიწერა და მისი საჯარო კითხვა რეგიონებში ამ ორგანიზაციების ინიციატივით იმართება.