ირაკლი კვარაცხელიას ცხედარს სენაკში დღეს დაასვენებენ
ინფორმაციას ასევე ადასტურებენ აფხაზეთის ლეგიტიმური მთავრობის სამეგრელო-ზემო სვანეთის წარმომადგენლობაში.
„სენაკში, დევნილთა ჩასახლებაში დაასვენებენ, იქ, სადაც მანამდე ცხოვრობდა, პროფსასწავლებლის საერთო საცხოვრებელში“, - განაცხადა წარმომადგენლობის ხელმძღვანელმა რეზო ქობალიამ.
ინფორმაცია ირაკლი კვარაცხელიას გარდაცვალების შესახებ, 12 მარტს, ღამით გავრცელდა. ოკუპირებული აფხაზეთიდან ევროკავშირის სადამკვირვებლო მისიის ცხელი ხაზით მიღებული ინფორმაციით, ირაკლი კვარაცხელიამ თავი მოიკლა. 13 მარტს, აფხაზეთის დე ფაქტო რესპუბლიკის უშიშროების სამსახურმა განაცხადა, რომ საქართველოს მოქალაქე, 1990 წელს დაბადებული ირაკლი კვარაცხელია „საზღვრის უკანონოდ გადაკვეთისთვის“ დააკავეს და შესაბამისი დოკუმენტების გასაფორმებლად გადაიყვანეს აფხაზეთში რუსეთის უშიშროების ფედერალური სამსახურის სასაზღვრო სამმართველოს შენობაში, სადაც კვარაცხელიამ თავი ჩამოიხრჩო. ირაკლი კვარაცხელიას ცხედარი საქართველოს ხელისუფლების მიერ კონტროლირებულ ტერიტორიაზე 13 მარტს, საღამოს გადმოასვენეს.
ის გალის რაიონის სოფელ აჩიგვარიდან იყო დევნილი და ბებიასთან ერთად სენაკის დევნილთა დასახლებაში ცხოვრობდა. მეზობლების თქმით, ბებიის გარდაცვალების შემდეგ, დაახლოებით 10 წელია ის დასახლებაში არ გამოჩენილა.