სახელმწიფო რწმუნებული წინასაარჩევნოდ ფერმერების მოსყიდვას ცდილობს - თენგიზ ჯგუშია
„მოწერელია აკეთებს რაღაც ფაროსანას პროგრამას, და ამომრჩევლებს ძალით აწევრიანებენ ფერმერთა გაერთიანებებში. ეს არის ამომრჩევლის მოსყიდვა. თუ გინდათ რეალურად მათი დახმარება, გამოყოს სახელმწიფომ თანხები და ამ ოფიციალურად გამოყოფილი თანხებით დაეხმარეთ ხალხს“, - აღნიშნა თენგიზ ჯგუშიამ.
მან მოუწოდა ხელისუფლებას, თავი დაანებონ ადმინისტრაციული რესურსის გამოყენებას. ორგანიზაციის ხელმძღვანელის თქმით, მართალია მმართველი პარტია ემზადება არჩევნების გაყალბებისთვის, თუმცა ამას ვერ შეძლებენ, რადგან ნებისმიერ მსგავს მცდელობას მომზადებულები შეხვედებიან.
თენგიზ ჯგუშიას თქმით, უახლოეს დღეებში უფრო კონკრეტულად ისაუბრებს, თუ როგორ იყენებენ ფაროსანას საწინააღმდეგო პროგრამას წინასაარჩევნოდ.
„ეს დაახლოებით კარტოფილის დარიგებას ჰგავს“, - განმარტა მან.
„სამეგრელოს ხმის“ დამფუძნებელმა 20 მარტსაც გამართა ბრიფინგი სამხარეო ადმინისტრაციის შენობაში, სადაც აღნიშნა, რომ, „ქართულმა ოცნებამ“ არჩევნების გაყალბება უკვე დაიწყო როგორც საჯარო მოსამსახურეებზე დავალებების გაცემით, ისე სკოლის და ბაღების პედაგოგებზე ზეწოლით. თენგიზ ჯგუშიას მტკიცებით, ამ პროცესს სახელმწიფო რწმუნებული ალექსანდრე მოწერელია შს მინისტრის და ვიცე პრემიერის, გიორგი გახარიას დავალებით ხელმძღვანელობს.