მიუსაფარი ძაღლების თავშესაფარში გადაყვანაზე მერიამ 30 ათასამდე ლარი გამოყო
სატენდერო დოკუმენტაციის მიხედვით, გასაწევი მომსახურება გულისხმობს: მუნიციპალიტეტის ტერიტორიაზე მოხეტიალე და უპატრონო ცხოველთა იზოლირებას ჰუმანური, უმტკივნეულო მეთოდით - ლასოთი/ბადით და ცხოველთა თავშესაფარში გადაყვანას სპეციალური სატრანსპორტო საშუალებით და განთავსებას შენობაში, ან ვოლიერებში;
გამარჯვებული კომპანიის ვალდებულებაში იქნება თავშესაფარში გადაყვანილი ცხოველების შესაბამისი გამოკვლევების შემდეგ მათი დამუშავება ჭიებზე, ბაქტერიებზე, პარაზიტებზე; სტერილიზაცია/კასტრაცია, ანტირაბიული და კომპლექსური ვაქცინაცია, იდენტიფიკაცია (სპეციალური ძაღლისათვის განკუთვნილი ქარხნული დანომრილი საჭდით, ბირკით); პროცედურის შესრულების შემდგეგ მათი ბუნებრივ არეალში დაბრუნება.
დოკუმენტი გულისხმობს ასევე უკურნებელი სენით დაავადებული ცხოველის, ან სიკვდილის წინა სტადიაში მყოფი დაავადებული ცხოველის ევთანაზიას და ცხოველთა ბიოთერმულ სამარხში (ბეიკერის ორმო) გადაყვანას.
ტენდერში გამარჯვებულმა მომსახურება უნდა უზრუნველყოს ეტაპობრივად, 2019 წლის 31 დეკემბრის ჩათვლით. მომსახურება უნდა გაწიოს არანაკლებ თვეში 2-ჯერ, მოთხოვნის შესაბამისად.
მიუსაფარი ცხოველების დაბინავების პრობლემა ზუგდიდის მუნიციპალიტეტს უკვე წლებია აქვს. ძაღლებისთვის თავშესაფრის აშენება მოქალაქეებმა რამდენჯერმე მოითხოვეს, თუმცა მერიაში განაცხადეს, რომ ფინანსები ამისათვის არ არსებობს. ცოტა ხნის წინ რეგიონული განვითარებისა და ინფრასტრუქტურის სამინისტროსმ განაცხადა, რომ 2019 წელს ცხოველთა თავშესაფრის აშენება ყველა რეგიონში იგეგმება, მათ შორის სამეგრელოშიც.