იუსტიციის სამინისტროს საგრანტო პროგრამის ფარგლებში დაფინანსებული პატიმრებისთვის სხვადასხვა სახის ტექნიკის გადაცემის პროცესი ზუგდიდიდან დაიწყო.

სამინისტროს პროგრამით წელს ქვეყნის მასშტაბით 34 ყოფილი პატიმრის ბიზნესიდეა დაფინანსდა, მათ შორის 13 სამეგრელოდან არის.

საგრანტო კონკურსში გამარჯვებულებს იუსტიციის სამინისტროს „დანაშაულის პრევენციის ცენტრის“ დირექტორი ლადო ჯავახიშვილი და პროექტის პარტნიორი საქველმოქმედო ჰუმანიტარული ცენტრ „აფხაზეთის“ წარმომადგენლები შეხვდნენ. მათ ტექნიკის გადაცემის პროცესში მიიღეს მონაწილეობა, რომელიც ცენტრ „აფხაზეთის“ ოფისის ეზოში გაიმართა.

„დანაშაულის პრევენციის ცენტრის“ ინფორმაციით, საუკეთესო ბიზნესიდეის მქონე ყოფილი პატიმრები, მთელი ქვეყნის მასშტაბით, კონკურსის წესით შეირჩნენ. მათზე გაცემული თანხის რაოდენობა 2000-დან 5 ათას ლარამდეა, ბიზნესის სპეციფიკაზეა დამოკიდებული.

ყოფილი პატიმრები საკუთარი იდეის განხორციელებას შეძლებენ სხვადასხვა მიმართულებით, რომელთა შორისაა სოფლის მეურნეობა, მომსახურება, წარმოება და სხვა.

სერთო ჯამში ყველაზე მეტი, 13 გამარჯვებული სამეგრელოს რეგიონში აღმოჩნდა, იმერეთში - 4, აჭარაში - 2, კახეთში - 2, შიდა ქართლში - 4, ქვემო ქართლში - 1, მცხეთა-მთიანეთში - 2 და თბილისში-6.

იუსტიციის სამინისტრო საგრანტო პროექტს ყოფილი პატიმრების ბიზნესიდეების დაფინანსებისათვის 2013 წლიდან ახორციელებს.