ზუგდიდის სოფელ ზედაეწრის საბავშვო ბაღის მასწავლებელს ხუთი წლის ბავშვზე ფიზიკურ და სიტყვიერ ძალადობაში ადანაშაულებენ. ბაღის გამგე ფატიმა ხუბუა ბრალდებას უარყოფს. ამბობს, რომ მსგავსი არაფერი მომხდარა, ეს არის აბსურდი და „ცარიელ ჭიქაში ხმაურის ატეხვის“ მცდელობა. მისივე თქმით, აღნიშნულ საქმეზე დაკითხეს მშობლები და ბავშვებიც, რომლებმაც არ დაადასტურეს ძალადობა.

„ის გოგო ეკლესიურია. ბავშვზე ხელი არასდროს არ აუწევია. პირიქით, ბავშვმა მოაგლიჯა პედაგოგს ცეპი და სათვალე და დედამისს დაუძახა. ყველამ დაუდასტურა, რომ ეს იყო ტყუილი. წესრიგისკენ მოუწოდა და აქტივობაში ჩართვისკენ მასწავლებელმა, თორემ სხვა არაფერი მომხდარა“, - გვითხრა ბაღის გამგემ.

თავად პედაგოგთან დაკავშირება ჩვენ ვერ შევძელით.

შინაგან საქმეთა სამინისტროში „ლაივპრესს“ უთხრეს, რომ შეტყობინების საფუძველზე დაიწყეს გამოძიება სისხლის სამართლის კოდექსის 126-ე მუხლით, რაც გულისხმობს ძალადობას.

„ვახორციელებთ საგამოძიებო მოქმედებებს“, - გვითხრეს შსს-ში.