ზუგდიდის საჭადრაკო სკოლა ფუნქციონირებას ყინულის სახლში განაგრძობს. ისინი აქ მარტის შუა რიცხვებიდან გადმოვიდნენ. თუმცა საჭადრაკო სკოლის სარეკონსტრუქციო სამუშაოების დაწყებიდან ამ დრომდე, იმ შენობაში იყვნენ, რომლის მეორე სართულზეც "ქართული ოცნების" საარჩევნო შტაბი მდებარეობს. სკოლა მესამეზე იყო განთავსებული.

რატომ შეიცვალეს დროებითი ლოკაცია, "სპორტულ დაწესებულებათა მართვის ცენტრის" ჭადრაკის განვითარების განყოფილების უფროსმა არ იცის. გიორგი ბერია ამბობს, რომ გადაწყვეტილება მერიამ მიიღო. უკავშირდება თუ არა ეს ყველაფერი მერის შუალედურ არჩევნებს, პასუხი არ აქვს. შეიძლებაო გვითხრა.

"რამდენ ხანს ვიქნებით აქ, ვერ გეტყვით. შეიძლება რეკონსტრუქციის დასრულებამდე აქ დავრჩეთ, ან ისევ დავბრუნდეთ მესამე სართულზე", - განმარტა მან "ლაივპრესთან" საუბარში.

გიორგი ბერიას თქმით, მათთვის არსებითი მნიშვნელობა არ ჰქონდა, სად გამოუყოფდნენ ალტერნატიულ ფართს. მთავარია ახალ სივრცეში შესაბამისი პირობები ყოფილიყო. ამბობს, რომ ასეც მოხდა და ყინულის სახლში ფართიც აქვთ და ცენტრალური გათბობაც. მართალია, თავიდან ჰქონდათ მოლოდინი, რომ ცოტა გაუჭირდებოდათ სითბოს, უჰაერობის მხრივ, მაგრამ საპირისპირო ვითარება დახვდათ. საჭადრაკო სკოლის დირექტორის თქმით, მხოლოდ ერთ დღეს, ტექნიკური შეფერხების გამო გათბობის პრობლემა შეიქმნა, რომელიც მოკლე დროშივე აღმოიფხვრა.

გიორგი ბერია ამბობს, რომ ძველ ფართში ყოველთვიური ქირის გადახდა უწევდათ, 1 600 ლარის ოდენობით, ყინულის სახლში კი უსასყიდლოდ არიან.

"ქართული ოცნების" საარჩევნო შტაბის განმარტებით, საჭადრაკო სკოლის გასვლა ამ შენობიდან, მერის მოახლოებულ არჩევნებს არ უკავშირდება. პრესსამსახურ პაატა ლაგვილავას თქმით, მას შემდეგ, რაც რეკონსტრუქციის შემდეგ ყინულის სახლი გაიხსნა, სკოლა იქ გადავიდა, რადგან ეს სახლი მუნიციპალიტეტის ბალანსზეა და მათ ქირისთვის თანხის გადახდა აღარ მოუწევთ.

ფართის გამოთავისუფლების შემდეგ კი შტაბმა შენობის მესამე სართულიც დაიქირავა. ამიერიდან ერთი ცენტრალიზებული შტაბი ექნებათ. ოთახების დამატებაც ამისთვის დასჭირდათ.

მეორე სართული მმართველ პარტიას აქ 2017 წლიდან აქვს დაქირავებული.

მერიაში "ლაივპრესს" ყინულის სახლში საჭადრაკო სკოლის გადასვლის იგივე მიზეზები უთხრეს. განმარტეს, რომ სკოლა აქ მანამ დარჩება, სანამ ჭადრაკის სასახლის სამუშაოები არ დასრულდება.

ჭადრაკის სასახლის სარემონტო სამუშაოები შარშან, ივლისში დაიწყო. სამუშაოები ორ ეტაპად ჩატარდება. პირველი ეტაპი უკვე დასრულებულია. პროექტის სრული ღირებულება 865 300,87 ლარია.

გეგმის მიხედვით, ზუგდიდს ზაფხულში განახლებული ჭადრაკის სასახლე ექნება.