აფხაზეთის დე ფაქტო რესპუბლიკის უსაფრთხოების სამსახური ინფორმაციას ავრცელებს ენგურის ხიდის ჩაკეტვასთან დაკავშირებით. მასში აღნიშნულია, რომ საქართველოს ტერიტორიაზე, მათ შორის ზუგდიდში მიმდინარე "პროვოკაციული ხასიათის" საპროტესტო აქციები იმართება, რომელიც ეხება "აფხაზეთის სახელმწიფოებრიობას".

"შესაბამისად, სახელმწიფო უსაფრთხოების სამსახურმა შეიმუშავა და ახორციელებს რეაგირების კომპლექსურ ღონისძიებებს. ერთ-ერთი ასეთი ღონისძიება არის აფხაზეთსა და საქართველოს საზღვარზე, ენგურის ხიდზე გადაადგილების დროებითი შეზღუდვა", - ნათქვამია ე.წ. უსაფრთხოების სამსახურის განცხადებაში.

მათივე ცნობით შეზღუდვა გადაადგილებაზე შეეხება, როგორც აფხაზეთის ტერიტორიაზე "უცხო ქვეყნის" მოქალაქეების შესვლას, ასევე ოკუპირებული ტერიტორიიდან "აფხაზეთის მოქალაქეების" გასვლას.

აფხაზეთის დე ფაქტო ხელისუფლების გადაწყვეტილებით, საღამოს ცხრის ნახევრისთვის ენგურის ხიდი დროებით ჩაიკეტა. ინფორმაცია მანამდე "ლაივპრესს" გალის მცხოვრებლებმა დაუდასტურეს. მათ არაფერი იციან, როდემდე გაგრძელდება აკრძალვა.

ხიდის ჩაკეტვის მოთხოვნით რაულ ხაჯიმბას ე.წ. პრლამენტმა 25 ივნისს მიმართა. ე.წ. დეპუტატმა დიმიტრი დბარმა სხდომაზე ამ მოთხოვნის მიზეზად დაასახელა საქართველოს პარლამენტში "ევროპული საქართველოს" წევრის აკაკი ბობოხიძის განცხადება, რომლითაც თბილისში, მართლმადიდებლობის საპარლამენტთაშორისო ასამბლეის სესიაზე რუსეთის დელეგაციის წევრებს მიმართა: "ვხოცავდი თქვენიანებს, ვხოცავდი აფხაზეთში, ვხოცავდი და დავხოცავ".

მისი მოთხოვნაა ასევე, ქართველი დეპუტატის წინააღმდეგ გამოძიება დაიწყოს სისხლის სამართლის მუხლით.