ამ დროისთვის ენგურის ხიდი ცალმხრივად ჩაიკეტა. ოკუპირებული აფხაზეთიდან დანარჩენ საქართველოში გადმოდიან მხოლოდ ის ადამიანები, რომლებსაც სამედიცინო დახმარება სჭირდებათ და ჯანმრთელობის ცნობა აქვს, გადაადგილებისთვის აუცილებელ დოკუმენტებთან ერთად.

ზუგდიდიდან გალის მიმართულებით გადაადგილება ჯერ არ შეზღუდულა. თუმცა როგორც "ლაივპრესს" ენგურის ხიდზე მოქალაქეებმა განუცხადეს, მათ აფრთხილებენ, რომ აქეთ აღარ გამოატარებენ. ე.წ. აფხაზურ საგუშაგოსთან ერთ-ერთს უთხრეს, რომ მიმოსვლა სამი თვითაა შეზღუდული, თუმცა დაზუსტებული ინფორმაცია მათთვის უცნობია.

გამონაკლისის სახით, ორმხრივად მოძარაობენ მხოლოდ ენგურჰესის თანამშრომლები.

აფხაზეთის დე ფაქტო ხელისუფლების გადაწყვეტილებით, 27 ივნისს, საღამოს ცხრის ნახევრისთვის ენგურის ხიდი დროებით ჩაიკეტა. ამ ფაქტთან დაკავშირებით სოხუმმა ოფიციალური განცხადებაც გაავრცელა. მასში აღნიშნულია, რომ საქართველოს ტერიტორიაზე, მათ შორის ზუგდიდში მიმდინარე "პროვოკაციული ხასიათის" საპროტესტო აქციები იმართება, რომელიც ეხება "აფხაზეთის სახელმწიფოებრიობას".

ხიდის ჩაკეტვის მოთხოვნით რაულ ხაჯიმბას ე.წ. პრლამენტმა 25 ივნისს მიმართა. მიზეზად დასახელდა საქართველოს პარლამენტში "ევროპული საქართველოს" წევრის აკაკი ბობოხიძის განცხადება, რომლითაც თბილისში, მართლმადიდებლობის საპარლამენტთაშორისო ასამბლეის სესიაზე რუსეთის დელეგაციის წევრებს მიმართა: "ვხოცავდი თქვენიანებს, ვხოცავდი აფხაზეთში, ვხოცავდი და დავხოცავ".

მისი მოთხოვნაა ასევე, ქართველი დეპუტატის წინააღმდეგ გამოძიება დაიწყოს სისხლის სამართლის მუხლით.