იმის გამო, რომ სასმელი წყლის მიკრობიოლოგიური კვლევის ლაბორატორია ზუგდიდში არ არსებობს, საბავშვო ბაღებს წყლის სინჯის ნიმუშების ტრანსპორტირება, სტანდარტით გათვალისწინებულ 6 საათში უჭირთ.

„ქალაქში 17 ბაღია, სოფლად კი 45. წყლის სინჯის აღებისას დიდი მნიშვნელობა აქვს დროს. ანუ ნიმუში სინჯის აღებიდან 6 საათში უნდა მოხდეს ლაბორატორიაში, რომელიც ფოთში, ქუთაისსა და ბათუმშია. ზუგდიდში კი წყლის ბიოლოგიური ანალიზი არ ტარდება. ერთდროულად, რომ ყველა ბაღიდან წყალი შეგროვდეს და ისე ჩავიდეს რომელიმე ქალაქის ლაბორატორიაში კი, ძალიან ძნელია“, - განაცხადა ზუგდიდის სკოლამდელი აღზრდის დაწესებულებათა ცენტრის წარმომადგენელმა ნანა გულორდავამ, სურსათის ეროვნული სააგენტოს წარმომადგენლებთან შეხვედრაზე.

სურსათის ეროვნული სააგენტოს სამეგრელო-ზემო სვანეთის სამმართველოს უფროსის, მარიკა გულუას განცხადებით, სააგენტოს შეუძლია შესთავაზოს სკოლამდელი აღზრდის ცენტრს, ბათუმის ლაბორატორიაში წყლის სინჯის ნიმუშების ტრანსპორტირებაში დახმარება.

„შემიძლია გრაფიკი გითხრათ, რომ შეძლოთ წყლის სინჯის ნიმუშების წაღება. რაც შეეხება ლაბორატორიის მოწყობას, ის დიდ თანხებთან არის დაკავშირებული და სურსათის ეროვნული სააგენტოს კომპეტენცია არ არის“, - უთხრა მარიკა გულუამ ზუგდიდის სკოლამდელი აღზრდის ცენტრის წარმომადგენელს.

დემოკრატიული ჩართულობის ცენტრის ზუგდიდის ოფისის კოორდინტორ ეკა მინჯორაიას თქმით, იმისთვის, რომ საბავშვო ბაღებში გაიოლდეს სასმელი წყლის ლაბორატორიული ანალიზის ჩატარება, შესაძლებელია სამოქალაქო ბიუჯეტის პროგრამის ფარგლებში მოქალაქეებმა დააყენონ ქიმიო-ბიოლოგიური კვლევის ლაბორატორიის გაკეთების ინიციატივა ადგილობრივი თვითმმართველობის წინაშე. მის მოსაზრებას დაეთანხმნენ შეხვედრაზე მყოფი მოქალაქეებიც.

დემოკრატიული ჩართულობის ცენტრის ოფისში დღეს, სურსათის ეროვნული სააგენტოს წარმომადგენლებმა ბიზნესოპერატორებთან და სკოლამდელი აღზრდის ცენტრის წარმომადგენლებთან ისაუბრეს სააგენტოს საქმიანობაზე.