ზუგდიდში, დადიანების მუზეუმის თანამშრომლები დაბალი ანაზღაურების გამო ჩივიან. ამბობენ, რომ უკვე წლებია მწირი ხელფასის პირობებში უწევთ მუშაობა. მიუხედავად იმისა, რომ კულტურის სამინისტროს არაერთხელ მისწერეს წერილი, დღემდე არაფერი შეცვლილა. აქ მეთვალყურის ხელფასი 244 ლარია, ექსკურსიამძღოლის 280. ფონდის მცველს კი 330 ლარს უხდიან. დირექტორის მოადგილის ანაზღაურება 400 ლარს შეადგენს.

მუზეუმის დირექტორის მოადგილე საგანმანათლებლო-სამეცნიერო დარგში, ნანა ფიფია "ლაივპრესთან" საუბარში ამბობს, რომ 10 იანვარს თანამშრომლების ხელმოწერილი წერილი განათლების მინისტრ მიხეილ ბატიაშვილს გაუგზავნეს, რომელზეც ჯერ პასუხი არ მიუღიათ. მისი თქმით, დირექტორ ლილი ბერაიასაც ჰქონდა არაერთხელ მცდელობა ვითარება გაეუმჯობესებინა, თუმცა რეაგირება არც ამ შემთხვევებზე ყოფილა. ნანა ფიფიასვე ცნობით, პარლამენტის დეპუტატმა ლელა ქებურიამაც მიმართა სამინისტროს საკანონმდებლო ორგანოს ტრიბუნიდან სამჯერ პრობლემის შესახებ. ერთ სხდომას მაშინდელი მინისტრი მიხეილ გიორგაძეც ესწებოდა. მინისტრებს წერილი პირადადაც მისწერა, თუმცა უშედეგოდ.

"აუცილებელია ცენტრალურ დონეზე მოხდეს ბიუჯეტის გადახედვა. მაშინ, როცა ტურიზმი ქვეყანაში განვითარებულია და დამთვალიერებელი ჩვენს მუზეუმს არ აკლია, წესით უნდა გვქონდეს ნორმალური შემოსავალი. შენობის აღდგენა-რეაბილიტაცია აუცილებელია, მაგრამ ექსპონატებზე ძვირფასი აქ ადამიანური რესურსია, რომლებიც მართლა შრომობენ და იცავენ ერის კულტურულ მემკვიდრეობას", - განმარტა ნანა ფიფიამ.

მწირ ანაზღაურებაზე საუბრობს მუზეუმის ექსკურსიამძღოლი ელზა ზოდელავაც. ამბობს, რომ დღემდე მათ მოთხოვნას არავინ გამოხმაურებია. ამიტომ, უკვე სექტემბერში გეგმავენ ყველამ ერთად ხმამაღლა თქვან საერთო სათქმელი ერთგვარი აქციის ფორმით.

"იმატებს დენის, გაზის, წყლის ფული. ყველას ხელფასს ემატება ჩვენს გარდა", - გვითხრა ელზა ზოდელავამ.

სხვა თანამშრომლებიც პირად საუბარში გვიდასტურებენ პრობლემას, თუმცა ჩვენთან ღიად საუბარს ერიდებიან. ისინი გამოეხმაურნენ მწერალ ზვიად კვარაცხელიას სტატუსს, სადაც ის მუზეუმში მომუშავეთა მწირ სახელფასო ანაზღაურებაზე წერს. ამბობს, რომ დადიანების სასახლეს ქალაქის სტუმრებთან ერთად ეწვია. მისი თქმით, ტურისტებით მუდმივად დატვირთული სასახლის საგანძურის მცველებს და ექსკურსიამძღოლებს როცა ასეთ მიზერულ თანხას უხდიან, რომელ მოტივაციასა და ღირსებაზე შეიძლება იყოს საერთოდ საუბარი.

"წილხვდომილობის დღესასწაულის აღნიშვნაზე მთელი სახელმწიფო და სასულიერო ინსტიტუციების მობილიზებას, აჯობებდა, ღვთისმშობლის კვართისა და უდიდესი მნიშვნელობის ექსპონატთა მცველებისთვის მიგექციათ ყურადღება", - აღნიშნავს ზვიად კვარაცხელია.

მის სტატუსს მუზეუმის თანამშრომლები გამოეხმაურნენ, პრობლემის არსებობა დაადასტურეს და აღნიშნეს, რომ მსგავსი მხარდაჭერა დღეს მათ ნამდვილად სჭირდებათ.

ჩვენ მუზეუმის დირექტორ ლილი ბერაიასთან დაკავშირება ვერ შევძელით. მან ჯერ სატელეფონო ზარს არ უპასუხა, შემდეგ კი ტელეფონი გამორთო.

განათლების, მეცნიერების, კულტურის და სპორტის სამინისტროში "ლაივპრესს" განუცხადეს, რომ ინფორმირებულები არიან და საკითხზე მუშაობენ, თუმცა ამ ეტაპზე კონკრეტულად რამის თქმა უჭირთ:

"ეს არ არის მხოლოდ ერთი მუზეუმის პრობლემა. რამე კონკრეტული თუ გვეცოდინება, როდის ჩაჯდება ბიუჯეტში, ამ ყველაფერს გავაჟღერებთ. ახლა ვერაფერს კონკრეტულს ვერ გეუბნებით. ვიცით ისედაც, რომ არსებობს დაბალი ხელფასების პრობლემა. დღის წესრიგში დგას. ეს ნიშნავს, რომ სამინისტრო ფიქრობს, აუცილებელია ხელფასების მომატება".